Որոնք են երիկամաքարային հիվանդության զարգացմանը նպաստող գործոններն ու խնդրի մասին հուշող հիմնական ախտանշանները

Երիկամաքարային հիվանդությունը բավական տարածված ախտաբանություն է, որը բնորոշվում է երիկամներում պինդ նյութերից առաջացած բյուրեղների կուտակմամբ։ Սա ամենատարածված ուրոլոգիական հիվանդություններից մեկն է, որը կարող է լուրջ հետևանքներ ունենալ, ուստի դրա ախտանշաններն ու զարգացմանը նպաստող գործոններն իմանալը շատ կարևոր է։

Երիկամները բռունցքի չափ օրգաններ են, որոնց գլխավոր գործառույթն օրգանիզմում հեղուկի ու քիմիական նյութերի մակարդակների կարգավորումն է, արյան զտումն ու արյան մեջ նատրիումի, կալիումի ու կալցիումի բալանսների պահպանումը: Առավել հաճախ երիկամային քարերը զարգանում են կալցիումի չափազանց բարձր մակարդակի և մի շարք այլ գործոնների ազդեցության հետևանքով, ուստի նման խնդրից խուսափելու համար հարկավոր է անպայման իմանալ այդ գործոններն ու հնարավորինս խուսափել դրանցից: 

Ինչն է նպաստում երիկամներում քարերի առաջացմանը

Երիկամաքարային հիվանդության զարգացմանը կարող են նպաստել որոշ գործոններ, որոնց մարդիկ հազվադեպ են ուշադրություն դարձնում և որոնք հաճախ չեն մտազուգորդվում նման վտանգավոր խնդրի զարգացման հետ: Նման գործոնների շարքին են դասվում.

Մեզի քիչ քանակությունը. սա բավական լուրջ խնդիր է, որը սովորաբար վկայում է, որ մարդը բավարար քանակությամբ ջուր չի խմում, ինչի հետևանքով նրա օրգանիզմն ինչպես հարկն է չի խոնավացվում և արդյունքում երիկամները չեն կարողանում լուծել դրանցով անցնող ու զտվող նյութերը:

Չկարգավորված սննդակարգը. հետազոտությունները ցույց են տվել, որ երիկամներում քարերի առաջացմանն են նպաստում սննդակարգում մեծ քանակությամբ աղի ու կենդանական ծագման սպիտակուցների գործածությունը, ուստի նման խնդրից խուսափելու համար հարկավոր է առաջին հերթին կարգավորել սննդակարգը:

Այլ գործոններ. վերոնշյալ գործոններից բացի երիկամներում քարերի առաջացման հավանականության բարձրացմանը կարող են նպաստել նաև ճարպակալումը, աղիների բորբոքային հիվադությունների առկայությունը (Կրոնի հիվանդություն, խոցային կոլիտ), որոշակի դեղորայքի կամ կենսաբանական ակտիվ հավելումների ընդուումը, ինչպես նաև ժառանգական նախատրամադրվածությունը:

Խնդրի մասին հուշող ախտանշանները

Երիկամաքարային հիվանդությունը շատ վտանգավոր խնդիր է, որի դեպքում հարկավոր է օր առաջ միջոցներ ձեռնարկել ու սկսել անհրաժեշտ բուժումը, ուստի հիվանդությունը ժամանակին ախտորոշելը շատ կարևոր է: Խնդրի բարդացումից ու կողմնակի խնդիրների զարգացումից խուսափելու համար հարկավոր է առաջին հերթին իմանալ դրա մասին հուշող հիմնական ախտանշանները, ուստի Մեծ Բրիտանիայի Առողջապահության ազգային ծառայության (NHS) մասնագետները ներկայացրել են դրանք:

Ինչպես գրում է medikforum.ru կայքը՝ վկայակոչելով NHS-ի գիտնականներին, երիկամաքարային հիվանդության մասին կարող են հուշել որովայնի կամ ցայլքի հատվածի ցավը, տղամարդկանց մոտ ամորձիների ցավը, մարմնի ջերմաստիճանի բարձրացումը, առատ ու ինտենսիվ քրտնարտադրությունը, մեջքի սաստիկ ցավը, որը կարող է ժամանակ առ ժամանակ մեղմվել և կրկին ուժգնանալ, փսխումով պայմանավորված ինքնազգացողության վատթարացումը, ինչպես նաև մեզի մեջ արյան առկայությունը:

Որոշ դեպքերում երիկամներում առաջացած քարերը կարող են շարժվել ու արգելափակել միզապարկը երիկամին միացնող ծորանը, ինչն էլ կդառնա լուրջ խնդիրների զարգացման պատճառ: Նման բարդությունը կարող է հանգեցնել երիկամների ախտահարման, ինչն էլ կուղեկցվի այնպիսի տհաճ ախտանշաններով, ինչպիսին են տենդը, որը դրսևորվում է մարմնի բարձր ջերմաստիճանով ու դողով, սաստիկ թուլության կամ հոգնածության զգացողությունը, փորլուծությունը, մեզի պղտորությունն ու սաստիկ տհաճ հոտը:

Նշված ախտանշանները ոչ միշտ են պայմանավորված լինում երիկամաքարային հիվանդությամբ, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: