Բժիշկը նշել է՝ որոնք են երիկամների հիվանդությունների զարգացման հիմնական պատճառներն ու խնդրից խուսափելու միջոցները

14:59 • 12.03.22

Երիկամների հիվանդությունները, այդ թվում նաև երիկամային անբավարարությունն առավել հաճախ զարգանում են անառողջ կենսակերպ վարող անձանց մոտ։ Այս մասին, ինչպես գրում է «Невские новости» պարբերականը, ասել է երիկամաբան Եվգենյա Շիլովան։

Մասնագետի խոսքով՝ երիկամային անբավարարության զարգացմանը նպաստող հիմնական ռիսկային գործոններն են ավելորդ քաշը, ծխախոտի գործածությունը, դեղորդայքի չարաշահումը, ինչպես նաև շաքարային դիաբետի ու զարկերակային գերճնշման առկայությունը։ Բացի այդ, շատ կարևոր է նաև հիվանդի տարիքը, որը ևս չի կարելի անտեսել։

Երիկամների հիվանդություններից խուսափելու համար մասնագետը խորհուրդ է տվել առաջին հերթին հետևել սննդակարգին ու ֆիզիկական ակտիվությանը, մարզվել և հնարավորինս հաճախ զբոսնել։ Բացի այդ, հարկավոր է անպայման ժամանակ առ ժամանակ բուժզննում ու արյան հետազոտություններ անցնել հիվանդությունը զարգացման վաղ փուլերում հայտնաբերելու և հնարավորինս շուտ բուժումն սկսելու համար։

Հարկ է հիշել, որ երիկամները մարդու միզազատական համակարգի մասն են կազմում և դասվում են օրգանիզմի ամենակարևոր օրգանների շարքին։ Դրանց աշխատանքի խանգարումը խիստ բացասաբար է անդրադառնում օրգանիզմի վրա՝ դրսևորվելով մի շարք տհաճ ախտանշաններով ու վատթարացնելով նաև այլ օրգանների ու համակարգերի աշխատանքը։ Ժամանակին միջոցներ չձեռնարկելու դեպքում այդ խանգարումները կարող են դառնալ վտանգավոր բարդությունների զարգացման և անգամ մահվան պատճառ, ուստի զարմանալի չէ, որ մասնագետները հորդորում են շատ ուշադիր լինել այս օրգանների առողջության նկատմամբ։ Առողջ երիկամները հավասարակշռում են մարմնի հանքանյութային բալանսն ու առաջին հերթին աղերի ու կալիումի մակարդակները։ Այս օրգանների ճիշտ աշխատանքի շնորհիվ օրգանիզմում պահպանվում են օգտակար սննդարար նյութերը, իսկ վնասակար տարրերը դուրս են բերվում մեզի հետ։ Բացի այդ, դրանք նաև արտադրում են հորմոններ, որոնք ազդում են այլ օրգանների աշխատանքի վրա։