Բնական ըմպելիք, որը կօգնի մեղմել գրիպի և հարբուխի ախտանշանները, կազատի ավելորդ քաշից ու կպահպանի սրտամկանի առողջությունը

Հարբուխը (մրսածություն) և գրիպը տարվա ցուրտ ամիսներին բավական հաճախ հանդիպող խնդիրներ են, որոնք դրսևորվում են բավական տհաճ ախտանշաններով ու խիստ բացասաբար են անդրադառնում մարդու կյանքի որակի վրա, ուստի մասնագետները խորհուրդ են տալիս անպայման միջոցներ ձեռնարկել դրանց տհաճ ախտանշանները մեղմելու համար:

Նման խնդիրների դեպքում մարդիկ հաճախ անուշադրության են մատնում ախտանշանները կամ ընդունում են հատուկ դեղամիջոցներ, սակայն մասնագետները վստահ են, որ խնդրի դեմ կարելի է պայքարել նաև բնական միջոցներով, որոնք շատ ավելի անվտանգ են ու հասանելի։ Ավելին այս բնական միջոցներն իրենց արդյունավետությամբ չեն զիջում դեղորայքին, իսկ որոշ դեպքերում կարող են անգամ ավելի արդյունավետ լինել, ուստի մինչ դեղատնային միջոցներ կիրառելը կարելի է նախ փորձել բուժվել դրանց օգնությամբ։

Նման արդյունավետ ու հասանելի բնական միջոցներից մեկը կարող է համարվել կոճապղպեղով թեյը, որը Եվրոպայում որպես հզոր դեղամիջոց սկսել է կիրառվել դեռ միջնադարում։ Ավելին՝ այս ըպելիքը ոչ միայն բուժում է գրիպն ու մրսածությունը, այլև կանխում է սրտամկանի հիվանդություններն ու օգնում է պայքարել ավելորդ քաշի դեմ։

Կոճապղպեղով թեյի օգտակար հատկությունները․

Այս ըմպելիքի արդյունավետությունը պայմանավորված է կոճապղպեղում մեծ քանակությամբ վիտամինների (A, B4, B9, B5, B6, C, E, K) և հանքանյութերի (երկաթ, կալիում, կալցիում, մագնեզիում, մանգան, պղինձ, ֆոսֆոր և ցինկ) պարունակությամբ։ Այն օժտված է խորխաբեր ու ջերմացնող հատկություններով, ինչի շնորհիվ էլ շատ օգտակար է գրիպի ու մրսածության դեպքում։ Բացի այդ, այս դեղաբույսը բարենպաստ ազդեցություն է ունենում արյունատար անոթների վրա, ազատում է այտուցներից, մեղմում է կոկորդի ցավն ու գլխացավը և ազատում է աղեստամոքսային տրակտի աշխատանքի խանգարումներով պայմանավորված տհաճ զգացողություններից։

Այս թեյի գործածությունը կօգնի նվազեցնել բարձր ջերմությունը, իսկ հակաբակտերիալ, հակաբորբոքային, ցավազրկող ու տոնուս հաղորդող հատկությունները կբարձրացնեն օրգանիզմի դիմադրողականությունը՝ օգնելով ավելի արդյունավետ կերպով պայքարել տարատեսակ վարակների դեմ։

Թեյի պատրաստման եղանակը․

Այս թեյի պատրաստման համար հարկավոր է 1 լիտր եռացող ջրին ավելացնել 2-3 ճաշի գդալ քերիչով մանրացրած կոճապղպեղի արմատ, 10 րոպե եփել թույլ կրակի վրա, այնուհետև լցնել եփուկը թերմոսի մեջ և ավելացնել 4 ճաշի գդալ կիտրոնի հյութ (կամ ¼ կիտրոն, որը հարկավոր է առանց կեղևազրկելու մանրացնել քերիչի օգնությամբ), մի փոքր աղացած սև պղպեղ և անանուխի մի քանի տերև (ըստ ցանկության)։ Շարունակել թրմել ևս 20 րոպե, իսկ երբ հեղուկը մի փոքր սառչի (մոտ 70°C) ավելացնել 5 ճաշի գդալ մեղր և խմել օրվա ընթացքում։

Այս բնական միջոցը շատ արդյունավետ է հիվանդության զարգացման սկզբնական շրջանում տհաճ զգացողությունները մեղմելու համար, սակայն հարկ է հիշել, որ որոշ դեպքերում այն կարող է հակացուցված լինել։ Օրինակ՝ աղեստամոքսային տրակտի քրոնիկ հիվանդությունների դեպքում կոճապղպեղը հարկավոր է զգուշորեն կիրառել, քանի որ այն կարող է գրգռել կերակրափողի ու ստամոքսի լորձաթաղանթները։ Սա է պատճառը, որ առողջական լուրջ խնդիրների դեպքում մինչ բնական դեղամիջոցներ կիրառելը հարկավոր է անպայման խորհրդակցել բժշկի հետ առողջությանն էլ ավելի մեծ վնաս չհասցնելու համար։

Նյութի աղբյուրը՝ med-practic.com