Որոնք են թոքերի քաղցկեղի մասին հուշող հիմնական ախտանշաններն ու հիվանդության զարգացմանը նպաստող գործոնները

Թոքերի քաղցկեղն ամենավտանգավոր ու տարածված ախտաբանություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է շատ երկար ժամանակ մնալ աննկատ, ինչի պատճառով էլ սովորաբար հայտնաբերվում է բավական ուշ, սակայն այնուամենայնիվ սա այն խնդիրներից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդութան մասին հուշող ախտանշաններն իմանալը շատ կարևոր է։ 

Քաղցկեղի այս տեսակի զարգացման հիմնական պատճառներից մեկը ծխախոտի գործածությունն է։ Ընդ որում՝ վտանգավոր է անգամ պասսիվ ծխելը։ Կախված ուռուցքի չափից և այլ օրգանների ախտահարվածությունից՝ այս հիվանդությունը կարող է դառնալ մահվան պատճառ, ուստի զարմանալի չէ, որ որքան շուտ է հիվանդությունն ախտորոշվում և նշանակվում բուժումը, այնքան ցածր է լինում մահվան հավանականությունը։

Ինչպես նշում են Մեծ Բրիտանիայի առողջապահական ազգային ծառայության (NHS) մասնագետները, այս հիվանդության վաղ ախտորոշումն օգնում է ժամանակին միջոցներ ձեռնարկել ու բարձրացնում է բարեհաջող բուժման հավանականությունը, ուստի հիվանդության մասին հուշող ախտանշաններն իմանալն ու դրանց առկայության դեպքում անմիջապես բժշկին դիմելը շատ կարևոր է։

Քաղցկեղի այս տեսակը զարգացման վաղ փուլերում սովորաբար չի դրսևորվում վառ ախտանշաններով․ դրանք ի հայտ են գալիս հիվանդության զարգացման հետ մեկտեղ։ Վաղ ի հայտ եկող հիմնական ախտանշաններն են համարվում հոգնածությունն ու էներգիայի պակասը, ուստի նման խնդիրները չի կարելի անտեսել։

Առավել հաճախ այս հիվանդությունը դրսևորվում է հազով, որը չի մեղմվում բավական երկար ժամանակ, ինչպես նաև հաճախակի բնույթ կրող վարակներով, ախորժակի կորստով, հոգնածության զգացումով ու քաշի նվազմամբ։ Վերոնշյալ ախտանշանների առկայության դեպքում հարկավոր է անհապաղ բուժզննում անցնել։

Վերոնշյալ ախտանշաններից բացի կարող են նկատվել նաև այնպիսինները, որոնք ավելի հազվադեպ են հանդիպում։ Դրանց շարքին են դասվում մատների տեսքի փոփոխությունը (ծռվածություն կամ ծայրերի հաստացում), ինչպես նաև դեմքի կամ պարանոցի այտուցը և կրծքավանդակի կամ ուսի մշտական ցավը։

Գոյություն ունեն որոշակի գործոններ, որոնք կարող են նպաստել այս հիվանդթության զարգացմանը, և դրանցից ամենավտանգավորը, ինչպես արդեն նշվելն է, ծխախոտի գործածությունն է։ Հետազոտությունները ցույց են տվել, որ թոքերի քաղցկեղով հիվանդներից 10-ից 7-ի մոտ հիվանդության զարգացումը պայմանավորված է լինում ծխախոտի գործածությամբ։ NHS-ի տվյալներով՝ օրական 25 գլանակ ծխախոտ օգտագործող մարդու մոտ այս հիվանդության զարգացման հավանականությունը 25 անգամ ավելի մեծ է, քան չծխող մարդու մոտ, ուստի նման խնդիրներից խուսափելու համար հարկավոր է օր առաջ հրաժարվել այս վտանգավոր սովորությունից։

Նյութի աղբյուրը՝ medikforum.ru