Առողջական ինչ խնդիրներով կարող է պայմանավորված լինել ականջներում լսվող աղմուկը

16:12 • 12.04.22

Ականջներում լսվող աղմուկը, որի գիտական անվանումն է տինիտուս, բավական տարածված երևույթ է, սակայն հազվադեպ է դիտարկվում որպես լուրջ խնդիր։ Շատերն անգամ ուշադրություն չեն դարձնում ժամանակ առ ժամանակ ի հայտ եկող այս աղմուկին, մինչդեռ իրականում այն կարող է բավական վտանգավոր ախտանշան լինել, ուստի մասնագետները նախազգուշացնում են, որ այն ոչ մի դեպքում չի կարելի անուշադրության մատնել։

Չինական Sina պարբերականը ներկայացրել է այս խնդրի հիմնական պատճառները, որոնք քչերին են հայտնի։

Գրգռիչներ․ ընդհանուր նյարդային վիճակը, գրգռվածությունը կամ վրդովվածությունը կարող են բացասաբար անդրադառնալ նյարդային վերջավորությունների վրա և հանգեցնել նման աղմուկի առաջացման։

Վնասակար սովորություններ․ ալկոհոլի և ծխախոտի գործածությունը շատ լուրջ ազդեցություն է ունենում ամբողջ օրգանիզմի, այդ թվում նաև հոգեկան ակտիվության վրա, ինչն էլ կարող է նման հետևանքներ ունենալ։

Արտաքին աղմուկի ազդեցություն․ լսողական նյարդը երկար ժամանակ մեծ ծանրաբեռնվածության ենթարկելու դեպքում ականջներում աղմուկ կարող է լսվել նաև հանգստի ժամանակ։ Նման խնդիրներից խուսափելու համար հարկավոր է հատուկ ականջակալներով պաշտպանել լսողական անցուղիները։

Դաշտան․ կանանց մոտ ականջներում լսվող աղմուկ կարող է նկատվել նաև դաշտանի ժամանակ, ինչը պայմանավորված է այդ շրջանում հորմոնալ ֆոնի փոփոխություններով։ Որպես կանոն դաշտանից հետո խնդիրը լուծվում է առանց միջամտության։

Տարբեր հիվանդություններ․ ականջներում արտասովոր աղմուկի առկայությունը կարող է նաև լսողական ապարատի որոշակի բորբոքային հիվանդությունների հետևանք լինել, ուստի նման խնդիրների դեպքում հարկավոր է զգոն լինել։

Ականջներում լսվող աղմուկը կարող է պայմանավորված լինել ինչպես ոչ շատ վտանգավոր խնդիրներով, այնպես էլ շատ լուրջ խանգարումներով, ուստի այն ոչ մի դեպքում չի կարելի անուշադրության մատնել։ Եթե խնդիրը պահպանվում է երկար ժամանակ, անդադար նյարդայնացնում է և բացասաբար է անդրադառնում կյանքի որակի վրա, ապա հարկավոր է դիմել մասնագետին, պարզել խնդրի պատճառն ու անհապաղ միջոցներ ձեռնարկել դրանից ազատվելու համար։