Ալերգիկ ռինիտի և մրսածության ախտանշանները կարող են նման լինել քաղցկեղի ախտանշաններին․ ինչպես տարբերել հիվանդությունները միմյանցից

13:57 • 27.04.22

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է ախտահարել գրեթե բոլոր օրգաններն ու հյուսվածքները և ախտորոշվել ինչպես կանանց, այնպես էլ տղամարդկանց մոտ։ Սա դասվում է այն հիվանդությունների շարքին, որոնց վաղ ախտորոշումը բարձրացնում է բարեհաջող բուժման հավանականությունը, սակայն խնդիրն այն է, որ օնկոլոգիական հիվադությունները կարող են բավական երկար ժամանակ զարգանալ առանց ախտանշանի կամ դրսևորվել այլ՝ քիչ վտանգավոր հիվանդություններին բնորոշ ախտանշաններով, ինչի պատճառով էլ հաճախ հայտնաբերվում են միայն զարգացման ուշ փուլերում, երբ բուժումն արդեն անարդյունավետ է լինում։

Ուռուցքաբան Մոնիկա Վասերմանի խոսքով՝ քաղցկեղի մասին կարող են հուշել ախտանշանները, որոնք շատ նման են մրսածության կամ ալերգիկ քթաբորբի ախտանշաններին, ինչի պատճառով էլ մարդիկ հաճախ ուշադրություն չեն դարձնում դրանց։ Առավել հաճախ այս հիվանդությունը դրսևորվում է կոկորդի գրգռվածությամբ ու ձայնի կոշտացմամբ կամ խռպոտությամբ, ինչը, ըստ բժշկի, բնորոշ է պարանոցի կամ գլխի քաղցկեղին։

«Սաստիկ հազը ևս կարող է լինել ինչպես թոքերի քաղցկեղի, այնպես էլ ալերգիկ ռինիտի ախտանշան», - նախազգուշացրել է Վասերմանը՝ ներկայացնելով այն ախտանշանները, որոնք կօգնեն տարբերել այս վտանգավոր հիվանդությունը հասարակ ալերգիայից։

Մասնագետի խոսքով՝ ալերգիայի դեպքում նկատվում են այնպիսի ախտանշաններ, ինչպիսին են․

հաճախակի հազը,
փռշտոցը,
արցունքահոսությունը,
քորը,
ականջի ցավը,
քթային արտադրությունն ու քթի փակվածությունը,
ոչ խորը շնչառությունը,
կոկորդի ցավն ու տհաճ զգացողությունները․
քթանցքերի խցանվածությունը,
գլխացավերը,
աղմկոտ շնչառությունը,
քթի կարմությունն ու փակվածությունը։

Ինչպես նշել է Վասերմանը, վերոնշյալ ախտանշաններից մի քանիսի առկայությունն ամենայն հավանականությամբ հուշում է ալերգիկ ռինիտի մասին։ Նման դեպքերում հստակ վստահ լինելու համար հարկավոր է խուսափել խնդրի պատճառ հանդիսացող ալերգեններից՝ փոշուց, ծաղկափոշուց, մազերից ու մորթուց, և հետևել օրգանիզմի արձագանքին։

«Եթե ախտանշանները մեղմվում են, ապա ձեզ մոտ, ամենայն հավանականությամբ, ալերգիկ ռինիտ է, սակայն եթե դրանք պահպանվում են անգամ անվտանգության բոլոր միջոցների ձեռնարկումից հետո, ապա կարող են լինել քաղցկեղի մասին վաղ նախազգուշացում», - բացատրել է մասնագետը՝ հավելելով, որ նման դեպքերում հարկավոր է հետևել նաև այլ ախտանշաններին, քանի որ քաղցկեղի ոչ բոլոր ախտնշաններն են համընկնում մրսածության ու ալերգիկ ռինիտի ախտանշանների հետ։

Բժշկի խոսքով՝ քաղցկեղը կարոող է դրսևորվել արտասովոր փոփոխություններով կամ անբացատրելի ախտանշաններով, որոնց շարքին են դասվում մարմնի որևէ հատվածում անսպասելի ի հայտ եկած ուռուցքներն ու պնդացումները, անբացատրելի արյունահոսությունն ու աղիների բնականոն աշխատանքի փոփոխությունը։

Նյութի աղբյուրը՝ medikforum.ru