Որոնք են ստամոքսի քաղցկեղի մասին հուշող առաջին ախտանշանները

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է ախտահարել գրեթե բոլոր օրգաններն ու հյուսվածքները և ախտորոշվել ինչպես կանանց, այնպես էլ տղամարդկանց մոտ։ Սա դասվում է այն հիվանդությունների շարքին, որոնց վաղ ախտորոշումը բարձրացնում է բարեհաջող բուժման հավանականությունը, սակայն խնդիրն այն է, որ օնկոլոգիական հիվադությունները կարող են բավական երկար ժամանակ զարգանալ առանց ախտանշանի կամ դրսևորվել այլ՝ քիչ վտանգավոր հիվանդություններին բնորոշ ախտանշաններով, ինչի պատճառով էլ հաճախ հայտնաբերվում են միայն զարգացման ուշ փուլերում, երբ բուժումն արդեն անարդյունավետ է լինում։

Այս հիվանդության ամենատարածված ու վտանգավոր տեսակներից մեկը ստամոքսի քաղցկեղն է, որի զարգացման հավանականությունը բարձրացնող հիմնական գործոններից մեկը Helicobakter pylori բակտերիան է, որը կարող է ախտահարել ինչպես մեծահասակներին, այնպես էլ երեխաներին։ Ավելին՝ վարակումը կարող է տեղի ունենալ բակտերիայի կրողի հետ առողջ մարդու շփման կամ պարզապես անձնական հիգիենային ինչպես հարկն է չհետևելու արդյունքում։ Բացի այդ, ստամոքսի քաղցկեղի զարգացման հավանականությունը կարող է բարձրանալ նաև օրգանի վնասվածքների, չափազանց տաք կամ կծու ուտեստների և ըմպելիքների գործածության, ինչպես նաև ստամոքսի քրոնիկ չբուժված հիվանդությունների առկայության հետևանքով։

Այս հիվանդության վաղաժամ ախտորոշումը կենսական նշանակություն ունի, քանի որ բուժման արդյունավետությունը կախված է ժամանակին ստացած բուժօգնությունից, սակայն խնդիրն այն է, որ մարդիկ հազվադեպ են ուշադրություն դարձնում խնդրի մասին հուշող ախտանշաններին, ինչի հետևանքով էլ հիվանդությունը շարունակում է աննկատ մնալ ու խորանալ։ Սակայն ռուս բժիշկները ներկայացրել են ստամոքսի քաղցկեղի մասին հուշող այն հիմնական ախտանշանները, որոնք սովորաբար ի հայտ են գալիս հիվանդության զարգացման վաղ փուլերում՝ թույլ տալով ժամանակին նկատել այն ու սկսել անհրաժեշտ բուժումը։

Այդ ախտանշանների շարքին են դասվում ստոծանու հատվածի ցավը, ախորժակի վատթարացումը կամ կորուստը, անբացատրելի քաշի կորուստը, հագեցածության զգացումն անգամ չնչին քանակությամբ սննդի ընդունումից հետո, սրտխառնոցը, կղանքի սև գույնը, թուլությունն ու հոգնածության զգացումն անգամ թեթև ֆիզիկական ակտիվության դեպքում։

Այնուամենայնիվ, հարկ է հիշել, որ վերոնշյալ ախտանշանները ոչ միշտ են պայմանավորված լինում քաղցկեղով, ուստի խուճապի մատնվելու կարիք չկա։ Դրանցից մեկի կամ մի քանիսի առկայության դեպքում հարկավոր է դիմել մասնագետին ու բուժզննում անցնել՝ անհրաժեշտության դեպքում բուժումն օր առաջ սկսելու համար։ Ոչ մի դեպքում չի կարելի անուշադրության մատնել խնդիրը կամ զբաղվել ինքնաբուժությամբ, քանի որ դա կարող է շատ ավելի վտանգավոր լինել և էլ ավելի վատթարացնել վիճակը։

Նյութի աղբյուրը՝ medikforum.ru