Անսպասելի ախտանշաններ, որոնք հուշում են արյան մեջ խոլեստերինի մակարդակի բարձրացման մասին

Խոլեստերինը ճարպանման նյութ է և համարվում է այն հիմնական բաղադրիչներից մեկը, որոնք օգնում են մարմնին տեղծել առողջ բջիջներ ու հորմոններ արտազատել: Սա շատ կարևոր նյութ է, սակայն դրա մակարդակի բարձրացումը կարող է շատ վտանգավոր խնդիրների, այդ թվում՝ սրտի հիվանդությունների ու գլխուղեղի կաթվածի զարգացման պատճառ դառնալ: Սա պայմանավորված է նրանով, որ խոլեստերինի բարձր մակարդակի դեպքում դրա մասնիկները կուտակվում են անոթներում և հանգեցնում են խցանման՝ խանգարելով արյան շրջանառությունը: Նման խնդիրներից խուսափելու համար հարկավոր է վերահսկողության տակ պահել խոլեստերինի մակարդակն ու խուսափել դրա բարձրացումից, սակայն առաջին հերթին հարկավոր է հիշել, որ գոյություն ունի խոլեստերինի երկու տեսակ, որոնք տարբեր կերպ են ազդում օրգանիզմի վրա:

Առաջին տեսակը ցածր խտության լիպոպրոտեիններն են կամ «վատ» խոլեստերինը, որն էլ կուտակվում է անոթային պատերի վնասված հատվածներում՝ առաջացնելով խցանումներ, մինչդեռ երկրորդ տեսակը բարձր խտության լիպոպրոտեիններն են կամ «լավ» խոլեստերինը, որը կապվում է «վատ» խոլեստերինի առաջացրած վահանիկներին ու դուրս է բերում դրանք օրգանիզմից: Այսպիսով՝ օրգանիզմի համար վնասակար են համարվում ցածր խտության լիպոպրոտեինները, որոնց մակարդակն էլ հենց հարկավոր է նվազեցնել անհրաժեշտության դեպքում:

Զարկերակներում խոլեստերինի, ճարպերի ու այլ վնասակար նյութերի կուտակման դեպքում զարգանում է աթերոսկլերոզ, որը շատ վտանգավոր ախտաբանություն է և ժամանակին չհայտնաբերելու ու միջոցներ չձեռնարկելու դեպքում կարող է վատ հետևանքներ ունենալ, մինչդեռ խնդիրն այն է, որ այս հիվանդությունը չի ունենում վառ ախտանշաններ, քանի դեռ զարկերակի խցանման հետևանքով օրգաններն ու հյուսվածքները չեն դադարում բավարար քանակությամբ արյուն ստանալ։

Նման խնդիրներից խուսափելու համար հարկավոր է սովորել տարբերել այն ախտանշանները, որոնց միջոցով օրգանիզմը հուշում է խոլեստերինի մակարդակի բարձրացման մասին։ Այդ ախտանշաններից մեկը կարող է լինել ձեռքերի կամ ոտքերի անսպասելի թմրածությունը կամ թուլությունը, որը հուշում է դեպի գլխուղեղը ձգվող անոթների խցանման մասին։

Բացի այդ, վերոնշյալ անոթների խցանման մասին կարող են հուշել նաև այլ ախտանշանները, որոնց շարքին են դասվում․

• խոսքի դժվարացումը,
• անհասկանալի խոսքը,
• մեկ աչքի տեսողության ժամանակավոր կորուստը,
• դեմքի մկանների կախվածությունը։

Աթերոսկլերոզի վտանգը նվազեցնելու համար հարկավոր է անպայման վերահսկողության տակ պահել խոլեստերինի մակարդակն ու ժամանակ առ ժամանակ արյան հետազոտություն անցնել, քանի որ ախտանշանների բացակայության պայմաններում միայն հետազոտությունը թույլ կտա հայտնաբերել խնդիրը։ Խոլեստերինի բարձր մակարդակի ախտորոշման դեպքում հարկավոր է անպայման դիմել մասնագետին անհրաժեշտ ցուցումներն ու նշանակումներն ստանալու համար, ինչպես նաև նվազեցնել հագեցած ճարպերի գործածությունը՝ փոխարինելով դրանք չհագեցած ճարպերով։

Նյութի աղբյուրը՝ medikforum.ru