Կաննում հայերը մրցանակի չարժանացան

Ավարտվեց ֆրանսիական Կանն քաղաքում անցկացվող կինոաշխարհի ամենաազդեցիկ փառատոնի 2008-ի շքերթը։ Մրցութային ծրագրերում ընդգրկված 3 հայազգի մասնակիցները` Ատոմ Էգոյանը, Դիանա Մկրտչյանը և Արման Թադևոսյանը, մրցանակի չարժանացան։

Կաննի 61-րդ փառատոնի գլխավոր մրցանակը` Ոսկե արմավենին, այս տարի հանձնվեց ֆրանսիական ֆիլմի։ Սա ֆրանսիական կինոյի առաջին նման մրցանակն էր 1987թ. հետո։ ։ Լոռան Կանտեի «Պատերից ներս» (“Entre les murs”) նկարահանված է եղել Ֆրանսուա Բեգոդոյի ստեղծագործության հիման վրա։ Ֆիլմը բացահայտում է ժամանակակից ֆրանսիական հասարակության սոցիալական դրաման, գործողությունները զարգանում են փարիզյան դպրոցներից մեկում։

Կաննի Grand Prix-ն բաժին հասավ իտալացի ռեժիսոր Մատտեո Գառոնեի «Գոմոռա» աշխատանքին։

Կանն 2008-ի լավագույն ռեժիսոր ճանաչվեց Նուրի Բիլժ Սեյլանը «Երեք կապիկ» ֆիլմի համար։

Լավագույն դերասանի պարգևը ստացավ Բենիսիո Դել Տոռոն, ով Սթիվեն Սոդերբերգի 4 ժամանոց "Չե" ֆիլմում մարմնավորել էր Էռնեստո Չե Գեվառային:

«Ես ցանկանում եմ այս մրցանակը նվիրել հենց իրեն՝ Չե Գեվառային», – ասել է Դել Տոռոն՝ պարգևը ստանալուց հետո։

Չնայած այս մրցանակին, ֆիլմը, ընդհանուր առմամբ, բավական սառն ընդունելության արժանացավ: Լավագույն կին դերասան է Ճանաչվել  Սանդրա Կորվելոնին, ով նկարահանվել է «Անցումի գիծը» ֆիլմում:

Կինոյի զարգացման գործում ունեցած ներդրման համար հատուկ մրցանակի արժանացան Կատրին Դենյովն ու Կլինտ Իստվուդը։