«ԱրմՄոնո» փառատոնը վերականգնել է իր նախկին անվանումը

Նախօրեին Պատանի հանդիսատեսի թատրոնում բացվել է մոնոներկայացումների «ԱրմՄոնո» միջազգային թատերական փառատոնը։ Փառատոնը բացվել է «Կոնտրաբաս» ներկայացմամբ՝ Հովհաննես Բաբախանյանի մասնակցությամբ։

Ինչպես հաղորդել փառատոնի նախկին տնօրեն, Հայաստանի թատերական գործիչների միության նախագահ Հակոբ Ղազանչյանը, «Կոնտրաբաս» ներկայացումը արդեն գրավել է թե՛ հայ, թե՛ արտասահմանյան հանդիսատեսի սերը։ Ըստ վերջինիս՝ մի քանի տարվա ընթացքում այդ բեմադրությունն արժանացել է մի շարք միջազգային գրան պրիների։

Ղազանչյանը նշել է, որ փառատոնը երկար ճանապարհ է անցել՝ շուրջ 7 տարի տևողությամբ։

«Յոթ տարի առաջ ծնվել է մեր փառատոնը, ինչը բավական մեծ իրադարձություն դարձավ հասարակական կյանքում»,- նշել է նախկին տնօրենը։

Միևնույն ժամանակ, նա հավելել է, որ երեք տարի առաջ փառատոնը մեծ քայլ առաջ արեց, երբ վերանվանվեց «Շեքսպիրյան փառատոն», որը միակը դարձավ ամբողջ աշխարհում։

Սակայն բազմաթիվ ընկերների խնդրանքով Ղազանչյանը կրկին վերադարձրեց նախկին անվանումը։ Այսպիսով, 2009թ. սկսած՝ մոնոներկայացումների փառատոնը կրելու է նախկին անունը՝ «ԱրմՄոնո»։

Եվ սա միակ նորարարությունը չէ ընթացիկ տարվա մեջ։ Այս անգամ «ԱրմՄոնոն» ընդլայնում է իր աշխարհագրական սահմանները. փառատոնը կանցկացվի ոչ միայն մայրաքաղաքում, այլև Սյունիքի մարզի Կապան քաղաքում։
Ղազանչյանը տեղեկացրել է, որ ապրիլի 13-ից ի վեր՝ բեմադրությունները տեղի կունենան Ալեքսանդր Շիրվանզադեի անվան Կապանի թատրոնի վերանորոգված շենքում։

Փառատոնին կմասնակցեն թատերական համույթներ Հայաստանից, Ռուսաստանից, Մեծ Բրիտանիայից, ԱՄՆ-ից, Լեհաստանից, Գերմանիայից, Ուկրաինայից և Ֆրանսիայից։

Լրագրողների հետ հանդիպման ընթացքում Ղազանչյանը ներկայացրել է «ԱրմՄոնոյի» նոր տնօրենին։ Այժմ նրան այդ պաշտոնում փոխարինելու է Մարիաննա Մխիթարյանը։ Իսկ Ղազանչյանը կշարունակի համակարգել «Շեքսպիրյան փառատոնը», որն «ԱրմՄոնոյից» առանձին է գործելու։