Աշխարհի կեսի տերը գալիս է Հայաստան. Վ. Ղուկասյանը Վ. Պուտինի այցի ու Երևանի ասֆալտապատման մասին

լուսանկարը՝ aravot.am-ի

Գյումրու նախկին քաղաքապետ Վարդան Ղուկասյանը Tert.am-ի հետ զրույցում անդրադառնալով ՌԴ նախագահի Հայաստան այցին՝ նշեց, որ այն առնչվում է մեր անվտանգությանը, որը վեր է ամեն ինչից: Ի պատասխան հարցի, թե անկախությունը վեր չէ՞ ամեն ինչից, ասաց. «Ո՞ր փոքր երկիրն է անկախ որ, էդ ինչ ստից խոսքեր եք խոսում: Լավ իմացեք՝ էսօր աշխարհում մեզ պես երկրները անկախ չեն կարող լինել, չկա այդպիսի մի երկիր, որ անկախ լինի. կամ պիտի եվրոպամետ լինի, կամ՝ ռուսամետ, կամ՝ ամերիկամետ: Էդ հեքիաթները ո՞րն են, լավ էլի, ամոթ է, էլի: Իհարկե, մենք մեր մեջ անկախ պիտի լինենք, մենք պետք է ընտրենք մեր պրեզիդենտը, մեր պառլամենտը, մեր քաղաքապետը»:

-Պարոն Ղուկասյան, ՌԴ նախագահի առաջիկա հարցի հետ կապված… Գյումրիի ավագանու անդամ Լևոն Բարսեղյանը հաշվել է՝ եթե մի կերպ հաջողվի կազմակերպել, որ ՌԴ նախագահ Վլադիմիր Պուտինը տարեկան երկու անգամ Գյումրի գա-գնա և այցելի նաև արվարձաններ, մոտավորապես 5 տարում Գյումրին կարգին քաղաք կդառնա։ Tert.am-ի հետ զրույցում նա կատակով ասաց, որ նույնիսկ կարող են նավահանգիստ բացել Գյումրիում…

-Ես Լևոն Բարսեղյանի հետ ընդհանրապես ի՞նչ գործ ունեմ: Նա ամերիկամետ է, դրսից «Սորոս»-ից փողեր է ստանում, իրենք այլ թև են: Ես, օրինակ, ռուսամետ եմ, մեկը եվրոպամետ է, մեկը «գեյ» է հարգում, մեկը՝ ադրբեջանցի է սիրում, մեկը՝ թուրքին: Ամեն մեկը իր սիրածով առաջնորդվում է:

-Եկեք չանդրադառնանք՝ ով ինչ է սիրում, ինչամետ է, ուղղակի, ըստ Ձեզ, Պուտինի այցը ի՞նչ կտա:

-Դրական ենք գնահատում, շատ ուրախ ենք, շատ լավ է, իրոք լեննականցիները, գյումրեցիները շատ ուրախ են, որ աշխարհի կեսի տերը գալիս է Հայաստան: Սա մեր անվտանգության հետ է կապված, և բոլոր մեր թշնամիները կզգաստանան, որ մենք բարեկամ ենք և էստեղ ունենք լուրջ ռուսական զինուժ, բազա, որի հետ խաղ անել չի կարելի:

-Կան խոսակցություններ, որ Գյումրին հնարավոր է՝ փակ քաղաք դառնա, անցագրով…

-Չեմ հավատում, որ Գյումրին փակ քաղաք կարող է դառնալ, հետո փակ քաղաքը ու՞մ է պետք որ, ավտոմատով մարդը մարդու գլխին կանգնի…Բայց թող ռուսական զորքը գա ավելանա, ինչքան ավելանա, էնքան էստեղ տուրիզմը կզարգանա: Մենք ընդհանրապես ռուսներով ենք ապրում, էլի, սենց անտեսված մի հատված է միշտ եղել:

-Կոնկրետ գյումրեցիները պրագմատիկ, «քյարի» իմաստով օգուտներ են ակնկալում ՌԴ նախագահի այցից, որ եթե գա Գյումրի, որոշ փողոցներ կասֆալտապատեն:

-Շատ լավ է, թող ասֆալտապատեն, ի՞նչ է պատահել որ: Ինչի՞ պետք է Երևանը էդքան ասֆալտապատեն, Երևանի փողոցները ասֆալտապատած փողոցներ են, նորից ասֆալտի վրա ասֆալտ են անում: Թող Երևանից մի քիչ դուրս գան, մնացած քաղաքներն էլ սարքեն, մենակ երևանցինե՞րը պետք է լավ զգան: Էդ խեղճ ժողովուրդը մեղք էլ է:

-Այսինքն՝ ուզում եք, որ Գյումրիի ասֆալտի վրա՞ էլ ասֆալտ անեն:

-Գյումրիում էդքան ասֆալտ չկա, Գյումրիի փողոցները շատ վատ վիճակում են. լավ է, որ նախագահը էդքան՝ 300 միլիոն տվեց, հրապարակը ասֆալտապատեցինք: Մենք անջախ կարկատան էինք անում՝ 13 տարի կարկատաններով: Չնայած որ եկա, 44 փողոց ասֆալտապատել եմ, վերջը, Գյումրիի նկատմամբ էդքան վատ չեմ եղել, բայց, փառք Աստծո, էդքան բնակարաններ, էդքան բաներ, էլի մենք շնորհակալ ենք: Բայց Երևանի հետ համեմատելի չէ. հանրապետության ամբողջ 929 համայնքները՝43 քաղաքներով մի նժարի վրա է դրված, Երևանը՝ մեկ այլ: Էդպիսի մոտեցում չի կարելի: Կամ բոլոր պետական կառույցների աշխատակիցները, չնայած 90 տոկոսը ապրում են Երևանում, իրենց համար բարեկեցիկ պայմաններ են ստեղծում, մեզ համար էլ այնպես, էլի:

-Լավ, իսկ Գյումրու աղքատ երեսը, որպես մեդալի մյուս կողմ Վլադիմիր Պուտինին չե՞ք ցույց տալու, Ձեր կարծիքով պետք է քողարկվի՞: Այսինքն՝ կասֆալտապատեն, դրոշակներ, փուչիկներ, իսկ տնակներում ապրող սոված մարդկանց էլ կթաքցնեն:

- Ճիշտն ասած՝ աղքատությունը գոյի հետ չի կարելի համեմատել: Ուրեմն՝ Պուտինի այցը մեր գոյության, անվտանգության հետ է կապված: Ես գիտեմ, որ մեր անվտանգությունը ամեն ինչից բարձր է. և՛ հագուստից, և՛ ուտելուց, և՛ որովայնից, և՛ գրպանից, ամեն ինչից: Եվ մենք պետք է առաջինը մեր անվտանգության հարցերին անդրադառնանք, հետո նոր սոցիալական վիճակին: Եվ ես գիտեմ, որ «դերժավայի» պետը, որ գա, որոշակի հարցեր կլուծվեն: Ինչո՞ւ ոչ, նաև սոցիալական ոլորտում:

-Օրինակ:

-Էս պահին, ճիշտն ասած, չեմ կարող ասել… Եթե ռուսական զորքը ավելանում է, սոցիալական վիճակը լավանում է, որովհետև էնտեղի աշխատավարձը՝ ռուսի աշխատավարձը, մի քանի անգամ բարձր է, քան մեր ամենաբարձր աշխատավարձ ստացող քաղաքացունը: Եվ նրանք այդ գումարները կծախսեն Գյումրի քաղաքում, ի՞նչ է պատահել, վա՞տ է: Դա հենց կնպաստի, որ սոցիալական վիճակը լավանա, եթե էդքան գումարներ ծախսեն, կգնան-կգան: Գիտե՞ս տուրիզմը իրենից ինչ է նշանակում:

-Ասում եք՝ անվտանգությունն ամեն ինչից վեր է, իսկ անկախությու՞նը: Չե՞նք կորցնում մեր անկախությունը:

- Ո՞ր փոքր երկիրն է անկախ որ, էդ ինչ ստից խոսքեր եք խոսում: Լավ իմացեք՝ էսօր աշխարհում մեզ պես երկրները անկախ չեն կարող լինել, չկա այդպիսի մի երկիր, որ անկախ լինի. կամ պիտի եվրոպամետ լինի, կամ՝ ռուսամետ, կամ՝ ամերիկամետ: Էդ հեքիաթները ո՞րն է, լավ էլի, ամոթ է, էլի: Իհարկե, մենք մեր մեջ անկախ պիտի լինենք, մենք պետք է ընտրենք մեր պրեզիդենտը, մեր պառլամենտը, մեր քաղաքապետը, բայց հիմա էդ էլ անկախ չի: Մենք մեր մեջ ե՞րբ ենք անկախ, որ դրսից (դրսից անկախ լինելու մասին) մտածենք:

-Բա այդքան զրկանքները, զոհերը, Ղարաբաղյան պատերազմը ինչի՞ համար էր:

-Գնացին զոհվեցին, մեր հողերը հետ վերցրեցինք: Բա դրա համար գնացինքն, բա ի՞նչ պիտի անեինք որ: Հիմա էլ, եթե պետք լինի, առաջիններից մեկը ես կլինեմ, բա ինչի՞ պտի չգնանք՝ մեր հողերը հետ վերցնենք: Փառք Աստծո, ռուսի հետ եթե ապրենք, ավելի կհարստանանք, ռուսական բարձր պաշտոնները մենք կզբաղեցնենք, մենք էդքան խելք ունենք, երեք միլիոն ժողովուրդ ենք ու էնքան խելացի ենք, որ Ռուսաստանի բոլոր կարևորագույն կառույցները կվերցնենք:

-Ուր է թե երեք միլիոն ենք, չե՞նք արտագաղթել:

-Դե ցավում եմ, էլի, որ արտագաղթում ենք: Ցավ եմ ապրում: Օրինակ՝ քա՞նի երեխա ունեք Դուք:

-Մեկ:

- Ամոթ է, որ մեկ երեխա ունեք, ում ասում ես հայրենասիրությունից է խոսում: Այսինքն՝ հայրենասիրությունը նաև շատ երեխաներ ունենալու մեջ է: Ու շատ իզուր են մտածում, որ «ես պետք է հարուստ լինեմ, որ շատ երեխաներ ունենամ»: Ես էդպես եմ մտածում: Ու հետո ասում են՝ ամեն երեխա իրա ղսմաթն ունի:

-Չե՞ք տեսել բազմազավակ ընտանիքներ՝ սովի մատնված:

-Մենք հիմա պետք է ավելացնենք ոչ թե էդ պաշտոնյաների, դատաիրավական ոլորտի աշխատողների, դատախազի աշխատավարձը՝ 400 հազար դրամ, այլ պետք է էդ մարդանց տանք այդպիսի աշխատավարձ, ու պառլամենտում մարդիկ պետք է ելնեն-պայքարեն դրա համար: Ու էդ Եվրոպան էլ պետք է չթելադրի, որ սրանց պիտի էդքան գումար տանք:

-Ճի՞շտ եք համարում գործազրկության նպաստներից զրկելը:

-Ճիշտն ասած, գործազրկության նպաստներ որ ստանում են ու չեն ուզում աշխատել, որ նպաստից չզրկվեն, դրանով մենք ծուլությունն ենք ներարկում մեր ժողովրդի մեջ: Բայց թող ավելանան թոշակները, նպաստները: Թող Երևանում լրացուցիչ ասֆալտ անելու տեղը մարդկանց մի հատ գոյության խնդիր լուծեն: Ես դրան եմ կողմնակից, ես կողմնակից եմ՝ աշխատավարձերի բարձրացում, թոշակների բարձրացում, մարդկանց բարեկեցիկ ապրելակերպ: Էլեկտրաէներգիա ունենք, ջուր ունենք՝ թող էժանացնեն, դարձնեն չնչին գումարներ, ի՞նչ է պատահել: Հա գազը թանկացրել են, բայց էլեկտրաէներգիան մերն է, չէ՞, ատոմակայանը: Ինչի՞ չեն էժանացնում: Վրաստանին ավելի էժան են տալիս, քան մեզ:

Հ. Գ. Հարցազրույցի վերջում Վարդան Ղուկասյանը հավելեց, որ բարկացած է լրատվամիջոցների վրա, նրա համար, որ «պոռնիկին կույսի տեղ են դնում, կույսին՝ պոռնիկի»: «Դա խայտառակություն է, անհարմար է, բարեպաշտին սարքել եք գող-ավազակ: Այս սա է ամենավատը: Երբ սա վերանա, էս երկրում ամեն ինչ լավ կլինի: Սա էլ գրեք անպայման»: