ԵՏՄ-ին ՀՀ–ի անդամակցումը հետաձգվում է, քանի որ Ռուսաստանի գլուխը շատ խառն է. Ալեքսանդր Արզումանյան
Ազգային ժողովի պատգամավոր Ալեքսանդր Արզումանյանը լրագրողների հետ հանդիպման ընթացքում խոսելով Հայաստանի՝ Եվրասիական տնտեսական միությանն անդամակցության հետաձգմանը, ասաց, թե դրա պատճառն այն է, որ Ռուսաստանն զբաղված է այլ հարցերով։
Պատգամավորը նշեց, որ եթե իրեն մնար, ապա ինքը կուզեր, որ հավերժ հետաձգվի այդ հարցը և երբեք Հայաստանը չանդամակցի ԵՏՄ-ին:
«Հայաստանը հետաքրքրություն չի ներկայացնում ԵՏՄ անդամ երկրների համար: Ռուսաստանին դա պետք է իր քաղաքական ամբիցիաները ամրապնդելու համար: Չանդամակցելը կամ ձգձգվելը պայմանավորված է նրանով, որ Ռուսաստանի գլուխը շատ խառն է, նա փորձում է իր հարաբերությունները լուծել Արևմուտքի հետ»,- ասաց Ալեքսանդր Արզումանյանը:
Վերջինիս բնորոշմամբ՝ դրանով է պայմանավորված անդամակցության հետաձգումը. Ռուսաստանը փորձում է իր բոլոր գործընկերների հետ հստակեցնել հարաբերությունները, նոր միայն ասել, թե ինչ է լինելու ԵՏՄ-ում:










