Բիոնիկ ոտք ունեցող Վիկտորյա Մոդեստան փոփ աստղ է դարձել (տեսանյութ, լուսանկարներ)

Վիկտորյա Մոդեստան ծագումով լատվիացի երգչուհի է, ով արագորեն հայտնի է դարձել իր յուրօրինակ կատարումների և բիոնիկ ոտքի շնորհիվ, որը գեղեցիկ բեմականացմամբ օգտագործվել է նրա երգի տեսահոլովակում, գրում է metro.co.uk-ը։

Վիկտորյայի ձախ ոտքը վնասված է եղել, և նա դժվարություններ է ունեցել քայլելու և հավասարակշռությունը պահելու հետ կապված, որի հետևանքով նա իր կամքով որոշել է հեռացնել իր ոտքի ծնկից ներքև հատվածը՝ 15 անհաջող վիրահատություններից հետո։

Նա տխրելու և անհաջողակ զգալու փոխարեն շարունակել է պայքարել և զբաղվել նրանով, ինչ սիրում է՝ երաժշտությամբ։

Հաշմանդամություն ունենալու փաստը 26-ամյա երիտասարդ կնոջը չի կանգնեցրել հաջողության հասնելու գործում. Channel 4 հայտնի բրիտանական հեռուստաընկերությունը ցուցադրել է նրա տեսահոլովակը։

Տեսահոլովակի դրվագներից մեկում նրա ոտքի պրոթեզն ամբողջությամբ պատված է Սվարովսկի քարերով։

Նրա հագուստը պատրաստել է մոդելավորող Վիվյեն Վեսթվուդը, իսկ տեսահոլովակի վերջում նա կատարում է գեղեցիկ պար իր ոտքի համար հատուկ ստեղծված սրածայր պրոթեզով։