Այս տարի ստեղծագործական բոլոր նպատակներս իրականացրել եմ. Վահան Արծրունի

Եթե արվեստի, մշակութային առումով կայացած երևույթ ունես բեմի վրա, ապա հասարակության մեջ կա հսկայական բանակ, որը պատրաստ է յուրաքանչյուր զոհողության, որպեսզի իր ներկայությունը ապահովի:  Այս մասին  Tert.am-ի հետ զրույցում ասաց երգիչ, երգահան Վահան Արծրունին` պատասխանելով հարցին, թե արդյո՞ք սոցիալական խնդիրներից դուրս հասարակությունը ժամանակ գտնում է իր հոգևոր պահանջմունքը բավարարելու համար: «Իմ և ո´չ միայն իմ օրինակով կարող եմ ասել, որ դա այդպես է»,-ասաց նա:

Նա նշեց, որ այն, ինչ նախատեսել էր անել 2014 թվականին, արդեն իրականացրել է: «Բազմաթիվ համերգային ծրագրեր, ձայնասկավառակի արտադրություն,  աչքիս առաջ ունեցած ստեղծագործական  բոլոր նպատակներս արդեն  իրականացրել եմ»,-ասաց նա:

Ինչ վերաբերում է 2015 թվականին, ապա Վահան Արծրունին ասաց. «Հաշվի առնելով, որ 2015 թվականը Ցեղասպանության հարյուրերոդ տարելիցն է,  մենք առավել արդյունավետ  պետք է աշխատեցնենք մեր ամբողջ ռեսուրսը` և´  մտային, և´ մշակութային, և´ ստեղծագործական առումներով:  Մենք պետք է հասնենք այն նպատակների իրականացմանը, որոնք արդիական են մեր ազգի համար և  նույնիսկ՝ կենսական»,-ասաց նա: