Ֆրանսիայի կինոթատրոններում այսօրվանից կցուցադրվի Ցեղասպանության մասին պատմող Ֆաթիհ Աքընի ֆիլմը

Ֆրանսիայի կինոթատրոններում այսօրվանից՝ հունվարի 14-ից, կցուցադրվի թուրքական ծագմամբ գերմանացի ռեժիսոր Ֆաթիհ Աքընի «Հատում» ֆիլմը, հաղորդում է Francetv Info-ն:

Ֆիլմն անդրադառնում է ավելի քան 1.5 մլն մարդու կյանք խլած Հայոց ցեղասպանությանը, որը Թուրքիան հրաժարվում է ճանաչել:

Լրատվամիջոցը վկայակոչում է Հելեն Մերջանյանին, ով երկար ժամանակ աշխատում է Հայոց ցեղասպանության ճանաչման և սփյուռքում երեխաների կրթության ուղղությամբ՝ նշելով «ռեժիսորի քաջությունը և բծախնդիր աշխատանքը»:

Ֆաթիհ Աքընը, սակայն, այսօր իր մեկնաբանությունների զոհ է, գրում է Francetv Info-ն: Այժմ մահվան սպառնալիքներ ստանալով Թուրքիայից՝ նա այլևս չի տեղաշարժվում առանց թիկնապահի:

Աքընի ֆիլմում պատմական իրադարձությունները նկարագրվում են մի մարդու ճակատագրի օրինակով՝ Նազարեթ անունով հայի (նրա դերը կատարել է ֆրանսիացի դերասան Թահար Ռահիմը)։