Եղանակն՝ այսօր
«Երաժշտություն հանուն խաղաղության» երաժիշտները համերգներ կունենան ՀՀ–ում և ԼՂՀ–ում
Հակամարտության գոտիներում բնակվող երիտասարդ երաժիշտներին աջակցություն ցուցաբերող և երաժշտության միջոցով միջմշակութային համագործակցությունը խթանող «Երաժշտություն հանուն խաղաղության» միջազգային բարեգործական նախագծի երաժիշտները Հայաստանում են:
Նախաձեռնության հեղինակները Հայաստանում և Արցախում հանդես կգան մի շարք համերգներով և վարպետության դասերով՝ բացահայտելով նոր տաղանդների:
«Երաժշտություն հանուն խաղաղության» միջազգային բարեգործական նախագիծն Հայաստան են հրավիրել Արամ Խաչատրյանի անվան տրիոն և Դասական երաժշտության զարգացման հիմնադրամը:
Արամ Խաչատրյանի տուն-թանգարանի տնօրեն, Խաչատրյանի անվան տրիոյի դաշնակահարուհի Արմինե Գրիգորյանն ընդգծեց, որ նախագիծն առաջին անգամ չէ, որ անցկացվում մեր երկրում:
«Մեր հյուրերից մի քանիսն արդեն երկրորդ անգամ են այցելում այստեղ: Համերգներով և վարպետության դասերով նախորդ այցի ընթացքում հանդես են եկել Երևանում, Հայաստանի մարզերում և Ստեփանակերտում: Նախագծի երաժիշտները հանդես են գալիս այն երկրներում, որտեղ կան հակամարտություններ, պատերազմներ: Նրանք աջակցում են այն շնորհալի երեխաներին, որոնց ընտրում են վարպետության դասերի ընթացքում»,- «Արմենպրես»-ի փոխանցմամբ՝ նշել է Արմինե Գրիգորյանը:
Նա ընդգծել է, որ «Երաժշտություն հանուն խաղաղության» միջազգային բարեգործական նախագծի երաժիշտներն այս այցի ընթացքում համերգներով հանդես կգան Երևանում, Էջմիածնում և Ստեփանակերտում:
Նախագծի համահիմնադիր, սաքսաֆոնահար Վիտալի Վատուլյան նշել է, որ հայկական կողմը մեծ աջակցություն է ցուցաբերում նախագծի իրականացմանը:
«Երբ առաջին անգամ Բեսլանում պետք է ելույթ ունենայինք, չգիտեինք, թե ինչ արձագանք կլինի: Համերգի ավարտին մեզ էին մոտենում մարդիկ արցունքոտ աչքերով: Որտեղ էլ եղել ենք՝ արձագանքը նույնն է: Երաժշտությունը սահմաններ չունի՝ կապ չունի, թե որ լեզվով ենք խոսում և որ կրոնն ենք դավանում»,- ասել է նա:
Նախագծի համահիմնադիր դաշնակահարուհի Մարիա Նեմցովան նշել է, որ երազում էր լինել Հայաստանում:
«Մեզ համար շատ հաճելի է այստեղ հանդես գալ: Կբացահայտենք նոր տաղանդների: Նախագծի գաղափարն առաջացել է չորս տարի առաջ: Արդեն հասցրել ենք այցելել 15 երկիր»,-նշել է նա:
«Երաժշտություն հանուն խաղաղության» միջազգային բարեգործական նախագիծը ստեղծվել է 2011 թվականին: Աշխարհի տարբեր երկրներում արդեն իրականացվել են մի քանի հարյուր իրադարձություն:
Studio One