Արգենտինահայ կոմպոզիտոր Ալիսիա Թերզյանը կոչ է արել մերկացնել սերիալով քողարկվող թուրքական հասարակության իրական պատկերը

Արգենտինահայ երաժիշտ, դիրիժոր և կոմպոզիտոր Ալիսիա Թերզյանը 7 կետից բաղկացած կոչ-առաջարկով է դիմել արգենտինահայերին` խնդրելով օգնել  մերկացնել թուրքական հասարակության իրական պատկերը, որը քողարկվում է հեռուստասերիալի միջոցով:

«Արգենտինական 13-րդ  հեռուստաալիքով հեռարձակվող «Հազար ու մի գիշեր» թուրքական սերիալի հետ կապված, որը   գովազդում են տարբեր ռադիոկայաններ, և յուրաքանչյուր եթերից 10 րոպե նվիրվում է սերիալի մասին խոսելուն, առաջարկում եմ, որ յուրաքանչյուր հայ զանգահարի ռադիոկայաններից որևէ մեկին, ինչպես ես եմ անում, և ասի հետևյալը.

1. Թուրքիան այն երկիրն է, որը Ցեղասպանություն  է իրագործել:

2. Երբ հեռուստասերիալում խոսվում է քրիստոնեական հուշարձանների մասին, շրջանցվում է այն փաստը, որ դրանք կանգնեցրել են հայ ճարտարապետները, և որոնք հայերի համար թուրքերի հետապնդումներից պատսպարվելու ապաստան են  հանդիսացել Ցեղասպանության ժամանակ: 

3. Քրիստոնեության այդ հուշարձաններն ու կոթողները պատկանել են հայերին՝ 3-4-րդ դարերից ի վեր, այնուհետև Ցեղասպանությունից հետո թուրքերի կողմից օգտագործվել  որպես ախոռներ, մինչև որ վերջիններս հասկացան, որ կարող են օգուտ քաղել այդ հուշարձաններից, և սկսեցին կիրառել զբոսաշրջության ոլորտում…

4. Թուրքական հասարակությունն ատում է կնոջը և նրան ստիպում  թողնել իր երեխաներին, եթե վերջինս ամուսնալուծվում է…

5. Թուրքիան շարունակում է խալիֆայություն լինել… Եթե ոչ, ապա ինչպե՞ս կարելի է բացատրել ամրոցի կառուցումը, որը Էրդողանը  որպես նստավայր է ներկայացրել:

6. Թուրքիան 1915-ին կոտորել է հայ ժողովրդին` գլխատելով մարդկանց…  չկար հեռուստացույց այդ ամենը լուսաբանելու համար:

7. Այսինքն` Թուրքիան այժմ էլ նույնն է, ինչպիսին որ ծնվել և գոյատևել է դարեր շարունակ… անկախ այս հեռուստասերիալից…

Կարծում եմ` բազմաթիվ միջոցներ կան պայքարելու, որպեսզի ՃԱՆԱՉՎԻ ՀԱՅՈՑ ՑԵՂԱՍՊԱՆՈՒԹՅՈՒՆԸ, առաջին հերթին` հենց ՀԱՐՅՈՒՐԱՄՅԱ ՏԱՐԵԼԻՑԻՆ ընդառաջ, երբ բոլորս սպասում ենք Ցեղասպանության ՃԱՆԱՉՄԱՆԸ  ո'չ թե Թուրքիայի, այլ՝ ՄԱԿ-ի անդամ բոլոր երկրների կողմից, որոնք դեռ չեն ճանաչել այն: 

Սիրով,

Ալիսիա»: