Եղանակն՝ այսօր
ՀՀ սփյուռքի նախարարն ընդունել է ֆրանսահայ երգիչ, գործիքավորող Եսայի Ալթունյանին
ՀՀ սփյուռքի նախարար Հրանուշ Հակոբյանն այսօր ընդունել է ֆրանսահայ երիտասարդ երգիչ, կոմպոզիտոր, պրոդյուսեր, գործիքավորող Եսայի Ալթունյանին:
Այս մասին հայտնում են ՀՀ սփյուռքի նախարարության մամուլի ծառայությունից։
Հաղորդագրության մեջ ասվում է, որ Ալթունյանը տեղեկացրել է, որ արմատներով Արևմտյան Հայաստանի Խարբերդ գավառից է, պապը ցեղասպանության ականատեսներից է եղել, որի հարազատներից շատերը զոհ են գնացել թուրքական յաթաղանին, և Եսային իր մեջ կրում է պապի հիշողություններն ու ցեղասպանության ցավը: Նա միշտ սերտ կապեր է պահպանել ֆրանսահայ համայնքի հետ, համագործակցել է Միշել Լեգրանի և այլ նշանավոր ֆրանսահայերի հետ:
Առաջին անգամ Հայաստան է եկել 1997-ին՝ «Երկիր և մշակույթ» կազմակերպության միջոցով և մասնակցել է Գոգարանի եկեղեցու վերանորոգմանը: Ներկայումս ֆրանսիական հեռուստաալիքներից մեկի երաժշտական տնօրենն է: Ունի իր անձնական ստուդիան Ֆրանսիայում:
Երաժշտություն է գրել ֆրանս-ալժիրյան համատեղ արտադրության ֆիլմի համար, որը ցուցադրվելու է Կաննի կինոփառատոնում: Աշխատել է նաև հայկական հեռուստաալիքների հետ, «Էրեբունի-Երևան» տեսահոլավակի սցենարի հեղինակն է:
Նախարարն իր ուրախությունն ու հպարտությունն է հայտնել արվեստում նրա ունեցած հաջողությունների, մասնավորապես, Հայոց ցեղասպանության 100-րդ տարելիցին նվիրված «Չեմ մոռանա» երգի ստեղծման առթիվ, որի նկարահանումները իրականացվել են Հայաստանում և Ֆրանսիայում:
Studio One