Մավրիտանցի ռեժիսորի «Տիմբուկտու» ֆիլմն արժանացել է ֆրանսիական «Սեզար» մրցանակի (լուսանկարներ)

Մավրիտանցի կինոռեժիսոր Աբդերահման Սիսակոն դարձել է Ֆրանսիայի կինեմատոգրաֆի ոլորտում ամենահեղինակավոր մրցանակի հանձնման արարողության գլխավոր հերոսը։ Նրա՝ Մալիում վերջին տարիների ողբերգական դեպքերին նվիրված «Տիմբուկտու» ֆիլմն արժանացել է «Սեզար» մրցանակի՝ հաղթելով 7 անվանակարգում, ներառյալ՝ «Լավագույն ֆիլմ», գրում է ՏԱՍՍ գործակալությունը։

Ըստ ավանդույթի՝ հիմնական մրցութային ծրագրից դուրս պատվավոր «Սեզար» մրցանակ է հանձնվել համաշխարհային կինեմատոգրաֆի զարգացման ոլորտում ներդրում ունենալու համար։ Այս տարի այդ մրցանակին արժանացել է ամերիկացի ռեժիսոր և դերասան Շոն Փենը։

Լավագույն դերասանուհի կոչմանն արժանացել է Ադել Անելը՝ ռեժիսոր Թոմ Կալյեի «Կործանիչներ» ֆիլմում կատարած դերի համար։  Լավագույն 2-րդ պլանի կանացի դերի համար մրցանակի է արժանացել Քրիստեն Սթյուարտը։

Լավագույն դերասան է ճանաչվել Պյեռ Նինեն՝ «Իվ Սեն Լորան» ֆիլմի համար։ Լավագույն օտարալեզու ֆիլմ անվանակարգում մրցանակի է արժանացել կանադացի ռեժիսոր Քսավյե Դոլանի «Mommy» ֆիլմը։