Որևէ ազդակ չեմ ստացել, ուղղակի կրկնել եմ այն, ինչ ասել եմ 20 տարի. Ա. Սաթյանը օրհներգը փոխելու մասին

Հայաստանի պետական օրհներգը՝ «Մեր հայրենիքը», փոխելու առաջարկ արած Հայաստանի կոմպոզիտորների միության նախագահ Արամ Սաթյանը Կառավարությունից, իշխանություններից որևէ ազդակ չի ստացել: Պարզապես կրկնել է այն, ինչ ասում է վերջին 20 տարիներին: Այս մասին Tert.am-ի հետ զրույցում ասաց Արամ Սաթյանը:

«Չէ, ես ասել եմ այն, ինչ ասում եմ արդեն 20 տարի, ինչ ասում են կոմպոզիտորները»,- ասաց Արամ Սաթյանը:

Հիշեցնենք, որ նա առաջարկել էր «Մեր հայրենիք»-ը փոխարինել Գաբրիել Երանյանի՝ 1812 թ. ստեղծագործությամբ՝ «Հայաստան» երգով, որն առավել հայտնի է Կոմիտասի մեկնաբանությամբ և Լուսինե Զաքարյանի կատարմամբ:

Հարցին,  թե ինչը  դուր չի գալիս «Մեր հայրենիք»-ում, Արամ Սաթյանը հարցով պատասխանեց՝ «Ձեզ դո՞ւր է գալիս» և լսելով պատասխան, որ արդեն սովորել ենք, նկատեց. «Ռաբիսին էլ են սովորում, վատ ճաշակին,  ամեն ինչին…վատ ապրելուն»:

Tert.am-ը զրուցեց նաև Դանիել Երաժիշտի հետ, ով   համակարծիք է գործընկերոջ հետ օրհներգի հարցում, իսկ որպես այլընտրանք տեսնում է Արամ Խաչատրյանի Սովետական Հայաստանի օրհներգի համար գրված երաժշտությունը՝ նոր բառերով:

«Բայց տեքստի փոփոխություն, արդիականացում պետք է լինի, իսկ հիմնի մեղեդին փառահեղ է»,- ասաց Դանիել Երաժիշտը, ով մի քիչ տխուր և «թառամած» է համարում ՀՀ գործող օրհներգը: