Ես սիրում եմ Քեթրինին բոլորից առավել. Մայքլ Դուգլասը՝ իր կյանքի և կնոջ հետ հարաբերությունների մասին (լուսանկարներ)

Հոլիվուդյան դերասան Մայքլ Դուգլասը հարցազրույց է տվել Event բրիտանական ամսագրին, որի ժամանակ պատմել է իր կյանքի, մասնավորապես կնոջ՝ Քեթրին Զետա- Ջոնսի հետ համատեղ կյանքի մասին, գրում է dailymail.co.uk-ը։

2010 թվականին նրա մոտ ախտորոշվել էր կոկորդի քաղցկեղ, ինչը պայմանավորված է եղել մարդու պապիլոմավիրուսով, որով նա հավանաբար վարակվել է կնոջից։ Ավարտելով յոթ շաբաթ տևած քիմիական և ճառագայթային բուժումը՝ Դուգլասն ասել է. «Երջանիկ եմ, որ ողջ մնացի»։

68-ամյա դերասանը, փորձելով բարձրացնել վիրուսի մասին իրազեկվածությունը, մեծ հանգանակություն է արել Պապիլոմավիրուսի ամերիկյան հիմնադրամին, ինչպես նաև բարձրաձայնել է իր հետ կատարվածի մասին։

Նա պատմել է, որ այսօր տարածված է պապիլոմային վիրուսի 100 տեսակ, դրանցից 20-30-ը կանանց մոտ կարող են նաև արգանդի վզիկի քաղցկեղ առաջացնել։ Նա թերթին ասել է, որ մասնագետը նաև սեռավարակի տարածվածությունը կապում է սեռական կրթության պակասի, անկանոն սեռական կապերի տարածման, առանց պահպանակի սեռական հարաբերություններ ունենալու հետ։

 «Ես շատ եմ ցավում, որ կնոջս երբևէ մեղադրել եմ իմ հետ կատարվածի համար։ Ես և կինս ամեն ինչ կարողացանք հարթել, և այժմ ամեն ինչ իր տեղում է։ Ես սիրում եմ Քեթրինին բոլորից առավել»,- ասել է դերասանը։

Նրա և կնոջ հարաբերությունների կարգավորմանը նպաստել են նրանց երկու երեխաները՝ 14-ամյա Դիլանը և 12-ամյա Քերիսը։

Դուգլասն անհանգստություն է հայտնել, որ իր որդին հասարակության ուշադրությունից և իր քաղցկեղի ծագման շուրջ ասեկոսեներից  հնարավոր է՝ ընկճվել է, ինչը հեռավորություն է առաջացրել հոր և իր միջև։

Նրա ավագ որդին՝ 36-ամյա Քեմերոն Դուգլասը, ժամանակին բանտում է հայտնվել կոկաին և մետամֆիտամին տեսակի թմրանյութերի վաճառքով զբաղվելու համար, ինչի մասին խոսելիս Դուգլասն ասել է. «Դա կարծես մղձավանջ լիներ բոլորիս համար»։

Դերասանը նաև խոսել է իր հայտնի հոր՝ Քըրք Դուգլասի հետ հարաբերությունների մասին՝ ասելով, որ չնայած նախկինում լարված հարաբերություններին՝ այժմ հայրը հպարտանում է իրենով։