Սոչիում « Նոր ալիքը» օգոստոսից տեղափոխել են հոկտեմբեր

Լատվիայի Յուրմալա քաղաքից Սոչի տեղափոխված «Նոր ալիք» միջազգային երաժշտական փառատոնի անցկացման ժամկետները օգոստոսից տեղափոխել են հոկտեմբեր: Այդ մասին այսօր հայտնել է Սոչիի քաղաքապետը, գրում է ria.ru-ն:

Ավելի վաղ կազմակերպչական կոմիտեն երիտասարդ կատարողների մրցույթը պատրաստվում էր անցկացնել օգոստոսի 25-ից մինչև 30-ը:

«Այս պահին հայտնի է դարձել, որ «Նոր ալիք 2015»-ը կկայանա հոկտեմբերի 2-ից մինչև 11-ը»,- ասված է հաղորդագրությունում: Փառատոնի անցկացման ժամկետների տեղափոխման պատճառները չեն նշվում:

«Նոր ալիք» մրցույթի եզրափակչին կմասնակցի 12 երկրից 16 երգիչ:

Միջազգային երաժշտական փառատոնի Լատվիայից Ռուսաստան տեղափոխմանը կազմակերպիչներին դրդել էր այն, որ լատվիական իշխանությունները 2014 թվականի հուլիսին քաղաքական դրդապատճառներով մի քանի ռուս կատարողների՝ Իոսիֆ Կոբզոնին, Վալերիային և Օլեգ Գազմանովին արգելել էին  մուտք գործել իրենց երկիր։