Արարատ Սարգսյանը «Սասունցի Դավիթ»–ը ներկայացրեց գլանակների ու կավի միջոցով

Տպագրական գործիքի նախատիպ հանդիսացող գլանակների ու կավի միջոցով արվեստագետ Արարատ Սարգսյանը Ժան Պոլ սրճարանում Անտիկյան ցուցասրահի նախաձեռնությամբ ցուցադրեց «Սասունցի Դավիթ» էպոսի առավել հայտնի դրվագները: Նա այս կերպ նորովի ներկայացրեց էպոսը հանրությանը:

Արվեստագետը բանավոր գյումրվա բարբառով պատմեց  էպոսը՝ միաժամանակ գլանակները անցկացնելով կավի վրա ու ստացված պատկերները պատին փակցնելով:
 

Tert.am-ի հետ զրույցում նշեց, որ ինքը ժամանակակից արվեստագետ է, իսկ ժամանակակից արվեստը արտահայտման տարբեր մեթոդներ է պահանջում: Այս անգամ ինքն ընտրել է գլանակների արվեստը:

«Սա այլ նախագծերում չեմ օգտագործի, միայն էպոսի ներկայացման համար: Գլանակի մեթոդը հին տպագրական մեթոդ է, շատ հայտնի է միջին Արևելքում և շումերաաքադական պոեմներն էին այս կերպ ներկայացվում՝ գլանակի ու կավի մեթոդով: Սա նաև բնորոշ է հայկական լեռնաշխարհին, ինչը ես շեշտադրել ու ցույց եմ տվել տարբեր երկրներում»,-ասաց նա:

Արվեստագետը նաև նշեց, որ «Սասունցի Դավիթ» պոեմի մասին մենք սխալ գիտելիքներ ունենք, քանի որ այն կոմունիզմի թեթև ձեռքով այնպես է մշակվել, որ իրականությունից հեռվացել է:

«Էպոսի մեջ իրականում շատ էրոտիկ տեսարաններ կան, հերոսները հաճախ խոսում են հայհոյախառը բառերով, այս ամենը առկա է նաև մեր կյանքում, բայց Սովետական միության ժամանակ հանեցին ամեն ինչ»,-ասաց նա: