Անկախությունը փաստ է և բացարձակ արժեք. Արմեն Ամիրյան

Եթե 24 տարի առաջ մենք առիթ ունեինք ընտրելու անկախությունը, «այո» կամ «ոչ» ասելու անկախությանը,  ապա այսօր ես շատ ուրախ եմ, որ իմ զավակներն այդ հնարավորությունն անգամ չունեն, որովհետև անկախությունը փաստ է և բացարձակ արժեք է:
 

Հայաստանի Հանրապետության Անկախության տոնի առթիվ ՀՀ Նախագահի կողմից Հայաստանի Հանրապետության մշակույթի վաստակավոր գործչի պատվավոր կոչումն ստանալուց հետո լրագրողների հետ զրույցում ասաց Հանրային ռադիոյի տնօրեն Արմեն Ամիրյանը:

«Շատ հուզիչ էր այն պահը, երբ մեր հերոս տղաներին հետմահու շնորհվում էր պարգևներ. սա վկայում է այն մասին, որ անկախությունն այլևս փաստ է, գոյություն ունի և մեր հայրենիքի համար ապագա է: Համոզված եմ, որ թեկուզ դժվարություններով ու փորձություններով այն «այո»-ն, որ ասացինք 24 տարի առաջ, այսօր տվել է իր պտուղները և մենք տեսնում ենք այն զարգացումը, ինչն այսօր ապրում է մեր հայրենիքը»,- ասաց Արմեն Ամիրյանը:

Նա հիշեցրեց նաև, որ 24 տարի առաջ, երբ հայ ժողովուրդն «այո» ասաց իր անկախությանը, այն ժամանակ հետխորհրդային հանրապետություններից և ոչ մեկը չէր ինքնորոշվել:

«Խորհրդային Հանրապետություններն «այո» ասացին անկախությանն այն ժամանակ, երբ փաստացի արդեն փլուզվել էր Սովետական Միությունը, երբ այլընտրանք չունեին, իսկ մեր կամքը շատ հաստատակամ էր, և մենք պետք է տեր կանգնենք այդ որոշմանը»,-նշեց Ամիրյանը: