Խաղաղության նոբելյան մրցանակի հանձնաժողովի քարտուղարին մեղադրել են գաղտնիքներ հրապարակելու համար

Խաղաղության նոբելյան մրցանակի հանձնաժողովը մեղադրել է իր նախկին քարտուղարին գաղտնիքներ հրապարակելու համար. նա, մասնավորապես, գիրք է հրատարակել, որտեղ պատմում է հետբեմյան մանրամասներ՝ կապված մրցանակների հանձնման հետ, գրում է Лента-ն։

Գեյր Լունդեսթադի «Խաղաղության քարտուղարը» խորագրով գիրքը պատմում է մարդկանց մասին, որոնք որոշել են մրցանակի ճակատագիրը, երբ նա 1990-2015թթ. եղել է Նորվեգիայի Նոբելյան ինստիտուտի տնօրենը։

Լունդեսթադը ներկա է եղել 5 լիազորված փորձագետներից բաղկացած հանձնաժողովի նիստերին, սակայն ինքն անձամբ ձայնի իրավունք չի ունեցել։

«Լունդեսթադը խախտել է գաղտնիությունը պահպանելու խոստումը միաժամանակ մի քանի կետերով»,- նշել է մարմինը՝ պարզաբանելով, որ հանձնաժողովի ներսում եղած բոլոր քննարկումները պետք է գաղտնի մնան 50 տարի։

Գրքում հեղինակը, մասնավորապես, նշել է, որ 2009-ին ԱՄՆ նախագահ Բարաք Օբամային Խաղաղության մրցանակ շնորհելը չի արդարացրել հանձնաժողովի հույսերը։