Օսկարակիր, Գինեսի ռեկորդակիր և պարզապես սիրված դերասան. այսօր ծննդյան 80-ամյակն է նշում Դասթին Հոֆմանը (լուսանկարներ)

Օգոստոսի 8-ին ծննդյան 80-րդ տարեդարձն է նշում հոլիվուդյան գերաստղերից մեկը՝ Դասթին Հոֆմանը, որը նախքան փառքի ու ճանաչման գագաթնակետին հասնելը հասցրել է սանիտար, մեքենագիր-քարտուղար, ինչպես նաև թատրոնի զգեստապահարանում աշխատել:

Հաջողակ դերասանական կարիերայի առաջին քայլը եղել է Լի Ստրասբերգի թատերական դպրոց ընդունվելը: Ուսմանը զուգահեռ՝ Հոֆմանը խաղացել է բրոդվեյան բեմադրություններում: Դերասանի առաջին գլխավոր կինոդերը «Շրջանավարտը» ֆիլմում է եղել, որի համար նա հեղինակավոր «Օսկար» մրցանակի է ներկայացվել:

Սակայն Հոֆմանը ստիպված է եղել 12 տարի սպասել բաղձալի «Օսկար» արձանիկին արժանանալու համար. 1979թ. էկրան է բարձրացել «Կրամերն ընդդեմ Կրամերի» ֆիլմը, որում ունեցած դերակատարման համար դերասանն արժանացել է բարձրագույն մրցանակին:

Դրանից 5 տարի անց Հոֆմանը ստացել է 2-րդ «Օսկար»-ը՝ «Անձրևի մարդը» ֆիլմում աուտիստ Ռեյմոնդ Բեբիթի դերի համար:

Հետաքրքրական է, որ «Փոքր մեծ մարդը» ֆիլմի շնորհիվ դերասանի անունը պաշտոնապես գրանցվել է հանրահայտ Գինեսի ռեկորդների գրքում: Հոֆմանն այդ ֆիլմում մարմնավորել է գլխավոր հերոսին՝ 17-ից մինչև 120 տարեկանը: