Երգչուհի Շինեյդ Օ'Քոնորը խոստովանել է, որ տառապում է հոգեկան հիվանդությունից և ցանկանում է ինքնասպան լինել (տեսանյութ)

Իռլանդացի հայտնի երգչուհի Շինեյդ Օ'Քոնորը հրապարակել է 12 րոպեանոց տեսանյութ, որում խոստովանել է, որ ապրում է Նյու Ջերսիի մոթելներից մեկում ու ցանկանում է ինքնասպան լինել:

Ինչպես նշում է The Daily Mail-ը, 50-ամյա երգչուհին, որը համաշխարհային ճանաչում է ձեռք բերել «Nothing Compares To You» հիթի շնորհիվ, տեսանյութը տեղադրել է իր ֆեսբուքյան էջում՝ խոստովանելով, որ ամեն օր պայքարում է ինքնասպանություն գործելու մտքերի դեմ՝ փորձելով ողջ մնալ:

«Հիմա ապրում եմ Նյու Ջերսիի մոթելներից մեկում՝ միայնակ: Կյանքումս հոգեթերապևտիցս բացի այլ մարդ չկա: Նա շատ լավ մարդ է, ասում է, որ ես իր հերոսն եմ, և դա միակ բանն է, որ ինձ ստիպում է ապրել: Հոգեկան հիվանդությունը թմրանյութի պես է՝ դիպչում է ցանկացած մարդու՝ անկախ նրա ով լինելուց: Եվ հանկարծ մարդիկ, որոնք պետք է սիրեին քեզ ու հոգ տանեին քո մասին, քեզ բանատեղ չեն դնում: Ես միլիոնավոր մարդկանց պես պայքարում եմ հոգեկան հիվանդության դեմ: Արդեն 2 տարի է, ինչ այս աշխարհում միայնակ եմ, քանի որ հոգեկան հիվանդ եմ ու ոչ ոք չի ցանկանում հոգ տանել իմ մասին»,-անկեղծացել է 4 երեխայի մայրը:

Աղբյուրը հավելում է, որ 2011թ. երգչուհու մոտ ախտորոշվել է բիպոլյար (երկբևեռ) աֆեկտիվ խանգարում (հոգեկան հիվանդություն, որը բնորոշվում է պարբերաբար ընթացող տրամադրության խանգարումներով)։