Forbes-ը հրապարակել է 2017թ. ամենաբարձր վարձատրվող դերասանների ցանկը (լուսանկարներ)

Ամերիկյան հեղինակավոր Forbes ամսագիրը հրապարակել է 2017 թվականի ամենաբարձր վարձատրվող դերասանների վարկանիշը. դերասանների ամբողջական ցանկը հրապարակվել է ամսագրի կայքում:

Ամսագրի տվյալների համաձայն՝ այս տարվա ամենաբարձր վարձատրվող դերասանն ամերիկացի դերասան Մարկ Ուոլբերգն է, որը վաստակել է 68 միլիոն դոլար: Գումարի մեծ մասը նա վաստակել է Շոն Անդերսի «Բարև, հայրիկ, Նոր տարի 2» և Մայքլ Բեյի «Տրանսֆորմերներ. Վերջին ասպետը» ֆիլմերի շնորհիվ:

Ամսագրի վարկանիշի երկրորդ տեղը զբաղեցրել է Դուեյն Ջոնսոնը, որն այս տարի վաստակել է 65 միլիոն դոլար:

Երրորդ տեղում հայտնվել է Վին Դիզելը՝ 54.5 միլիոն դոլար հասույթով:

Վարկանիշի առաջին տասնյակում ներառվել են նաև Ադամ Սենդլերը (50.5 մլն դոլար), Ջեքի Չանը (49 մլն դոլար), Ռոբերտ Դաունի Կրտսերը (48 մլն դոլար), Թոմ Քրուզը (43 մլն դոլար) և երեք բոլիվուդյան դերասան՝ Շահրուխ Խանը (38 մլն դոլար), Սալման Խանը (37 մլն դոլար) և Ակշայ Կումարը (35.5 մլն դոլար):