Իտալական թանգարանում անծանոթը, «սրիկա՛» բղավելով, հարձակվել է Հիտլերի կտավի վրա

Իտալական Սալո քաղաքում «Խենթության թանգարան» խորագրով ցուցահանդեսի ժամանակ անհայտ անձը, «սրիկա՛» բղավելով, հարձակվել է ֆաշիստական Գերմանիայի առաջնորդ Ադոլֆ Հիտլերի կտավի վրա:

Ինչպես նշում է lenta.ru-ն, հարձակվողը փորձել է պտուտակահանով ծակել կտավը:

Անվտանգության ծառայության աշխատակիցները նրան հեռու են տարել կտավից, ինչից հետո նա անհետացել է: Աղբյուրը մանրամասնում է, որ Հիտլերի վրձնին պատկանող կտավը չնչին վնաս է կրել:

Հայտնի է, որ կտավի տերը Գերմանիայից մասնավոր հավաքորդ է: Նշվում է, որ միջադեպից հետո նա ոստիկանություն չի դիմել:

Հունիսին հաղորդվել էր, որ Հիտլերի նկարած կտավները վաճառքի են հանվել Գերմանիայում: Ընդհանուր առմամբ, վաճառքի էր հանվել 14 կտավ, որոնց մեծ մասի վրա ֆյուրերի ինքնագիրն է: