Ինչու արքայազն Ուիլյամն ամուսնական մատանի չի կրում

Մեծ Բրիտանիայի դքսուհի Քեյթ Միդլթոնին մշտապես կարելի է նկատել 18 կարատանոց ոսկուց պատրաստված ամուսնական մատանիով, մինչդեռ նրա ամուսնու՝ արքայազն Ուիլյամի մատին մատանի չի լինում:

Այս մասին գրում է Rd.com-ը՝ մեկնաբանելով, թե ինչու արքայազնն ամուսնական մատանի չի կրում և թե ինչ է դա խորհրդանշում. արքայազնի մատնեմատին մատանու բացակայությունը ոչինչ չի նշանակում, քանի որ դա ընդունված երևույթ է թագավորական ընտանիքում:

Դեռևս մինչև նրանց ամուսնությունը պալատական պաշտոնյաները հայտարարել էին, որ Ուիլյամը մատանի չի կրելու և դքսուհին իրականում երբևէ մատանի չի դրել նրա մատին անգամ պսակադրության ժամանակ:

Ինչպես նշվում է, մատանի չկրելն արքայազն Ուիլյամի անհատական նախընտրությունն է: Նա որոշել է որևէ զարդ չկրել, այդ թվում և մատանին: Նա արքայական ընտանիքի առաջին ներկայացուցիչը չէ, որը նման որոշում է կայացրել:

Նրա պապը՝ արքայազն Ֆիլիպը նույնպես երբեք ամուսնական մատանի չի կրել, թեև 70 տարի ամուսնացած է թագուհի Էլիզաբեթ Երկրորդի հետ: