Հայուհին ու ադրբեջանուհին մի բեմում կատարել են «Սարի աղջիկ» երգի իրենց տարբերակները (տեսանյութ)

Վրաստանի մայրաքաղաք Թբիլիսիում KavkazJazzFestival-2018 ջազ փառատոնի շրջանակում մի բեմի վրա ելույթ են ունեցել Հայաստանն ու Ադրբեջանը ներկայացնող երգչուհիները՝ կատարելով հայկական «Սարի աղջիկ» երգի իրենց տարբերականը:

Ինչպես նշում է rusarminfo.ru կայքը, հայուհի Աննա Բադալյանն ու ադրբեջանուհի Նարգիլա Մեյտովան «Սարի աղջիկ»-ը կատարել են դուդուկահար Իվանե Մկրտչյանի, ինչպես նաև վրացական Iriao էթնո ջազ խմբի նվագակցությամբ:

Նրանք երգել են՝ իրար հաջորդելով. Մեյտովան առաջին նախադասությունը երգել է ադրբեջաներեն, հետո շարունակել է Բադալյանը՝ արդեն հայերեն:

Հավելենք, որ KavkazJazzFestival-2018-ը մեկնարկել է հունիսի 7-ին: Դրան մասնակցում են ջազմեններ Վրաստանից, Հայաստանից, Ադրբեջանից ու Թուրքիայից: Փառատոնի գլխավոր նպատակը Հարավային Կովկասում ջազի տարածումն է: