«Գահերի խաղի» աստղի մարմնի վրա հեռուստասերիալի սփոյլեր են գտել (լուսանկար)

Բրիտանացի դերասանուհի Սոֆի Թըրների մարմնի վրա դաջվածք են նկատել, որը կարող է դառնալ «Գահերի խաղը» հեռուստասերիալի գլխավոր սփոյլերը: Այս մասին հաղորդում է Mashable-ը:

Թըրները հայտնի է հեռուստասերիալում Սանսա Ստարկի դերով: Դերասանուհու դաջվածքի լուսանկարն Instagram-ում հրապարակել է դաջվածքի հեղինակ Լորեն Վինցերը՝ նշելով Թըրներին լուսանկարի վրա ու շնորհակալություն հայտնելով աշխատանքն իրեն վստահելու համար:

Դաջվածքում պատկերված է Ստարկերի տան զինանշանի գայլը, իսկ ներքևում հեռուստասերիալից հայտնի մեջբերման հատված է գրված. «Ոհմակն ապրում է»:

Ամբողջական մեջբերումը հետևյալն է. «Երբ ձյուն է գալիս, ու փչում են սպիտակ քամիները, միայնակ գայլը մահանում է, սակայն ոհմակն ապրում է»:

Հրապարակման մեկնաբանություններում օգտատերերը ենթադրել են, որ սա կարող է ակնարկ լինել Ստարկերի ընտանիքի ապագայի վերաբերյալ: Երկրպագուները հույս են հայտնել, որ կերպարների գոնե կեսը ողջ կմնա մինչև հեռուստասերիալի ավարտը: