ԱՄՆ Հայ դատի հանձնախումբը մրցանակ կշնորհի Ցեղասպանության մասին «Մերժման ճարտարապետները» ֆիլմի ստեղծողներին

Ռեժիսոր Դևիդ Լի Ջոնսի՝ Հայոց ցեղասպանության մասին պատմող «Մերժման ճարտարապետները» (Architects of Denial) վավերագրական ֆիլմի գործադիր պրոդյուսերներն ու ստեղծագործական թիմն ԱՄՆ-ի Հայ դատի հանձնախմբի արևմտյան թևի կողմից կպարգևատրվեն՝ ստանալով ANCA-WR-ի Excellence in Media մրցանակ:

Ինչպես հայտնում է Asbarez-ը, մրցանակի հանձնման արարողությունը կկայանա հոկտեմբերի 7-ին՝ Beverly Hilton հյուրանոցում:

ANCA-WR-ի գործադիր տնօրեն Նոռա Հովսեփյանն ընդգծել է, որ «Մերժման ճարտարապետները» շատ արդյունավետ գործիք է պատմական փաստը հերքող թուրքական և ադրբեջանական լոբբիստական խմբերի դեմ պայքարում:

Օսմանյան կայսրությունում իրականացված Հայոց ցեղասպանության մասին պատմող «Մերժման ճարտարապետները» վավերագրական ֆիլմը մեծ էկրան էր բարձրացել 2017թ. աշնանը:

Ֆիլմի հերոսներն են պատմաբաններ, գիտնականներ, ցեղասպանությունների փորձագետներ, WikiLeaks-ի հիմնադիր Ջուլիան Ասանժը, որոնք քննարկում են, թե ինչու են Միացյալ Նահանգներն ու Մեծ Բրիտանիան մինչ օրս վիճարկում պատմական փաստերը` հրաժարվելով թուրքերի արածին տալ ցեղասպանություն սահմանումը: