Աստղային շիկահերներ. Մարգո Ռոբին, Շառլիզ Թերոնն ու Նիկոլ Քիդմանը կնկարահանվեն սեռական բռնության մասին ֆիլմում

Հոլիվուդի աստղային շիկահերներից երեքը՝ Մարգո Ռոբին, Շառլիզ Թերոնն ու Նիկոլ Քիդմանը, բանակցում են Fox News հեռուստաալիքի շուրջ ծագած սեռական սկանդալի մասին ֆիլմում նկարահանվելու շուրջ:

Ինչպես հայտնում է The Guardian-ը, նախնական պայմանավորվածության համաձայն՝ Քիդմանը խաղալու է Fox News-ի հաղորդավարուհի Գրեթչեն Կարլսոնի դերը: Հայտնի է, որ այս կինն առաջինն էր, ով պատմել է հեռուստաալիքի անձնակազմում առկա սեքսիզմի, կանանց նկատմամբ սեռական ոտնձգությունների «մշակույթի» մասին:

Հաղորդավարուհու բացահայտումից հետո, տասնյակ այլ կանայք բարձրաձայնել են Fox News-ի նախկին ղեկավար Ռոջեր Այլսի ոչ պատշաճ վարքի մասին:

Շառլիզ Թերոնը կմարմնավորի հեռուստաալիքի նախկին հաղորդավարուհի Մեգան Քելիի դերը: Կինը նախկինում խոստովանել էր, որ Այլսը սեռական ոտնձգություն է թույլ տվել իր նկատմամբ:

Մինչդեռ Մարգո Ռոբին կմարմնավորի Fox News-ի պրոդյուսերներից մեկին:

Ֆիլմը դեռևս անվանում չունի, սցենարը ևս պատրաստ չէ: