Հնագետների կողմից Վայոց ձորում մեծ քանակությամբ ամրոցներ են արձանագրվել, որոնք մինչ օրս անհայտ էին (տեսանյութ)

Վայոց ձորի մարզում Եղեգնաձորի արշավախմբերի շնորհիվ մինչ օրս անհայտ մեծ քանակությամբ ամրոցներ են արձանագրվել, որոնք հնարավորություն են տալիս պատկերացում կազմել Ք.ա 2-րդ հազարամյակի վերջին և առաջին հազարամյակի առաջին կեսի մասին: Այս մասին այսօր հրավիրված ասուլիսում ասաց ՀՀ ԳԱԱ հնագիտության և ազգագրության ինստիտուտի տնօրեն Պավել Ավետիսյանը:

«Այդ հուշարձանների մի զգալի մասն ունի Վանի թագավորության շրջանի շերտեր: Մասնավորապես, արքաների կողմից կառուցած ամրոցների, բնակատեղիների մասին նոր պատկերացումներ ենք ունենում: Սրանք նոր փաստագրումներ են»,- նշեց Պավել Ավետիսյանը:

Նրա խոսքով՝ այս տարի նախատեսվում է նաև ուսումնասիրել ժայռափոր, ժայռակերտ կառույցներ, որոնց մեծ մասը նույնպես վերաբերում է Վանի թագավարության շրջանին:

ՀՀ ԳԱԱ Հնագիտության և ազգագրության ինստիտուտի գիտաշխատող Բորիս Գասպարյանը հայտնեց, որ Վայոց ձորը հնագիտական տեսանկյունից բավական հետաքրքիր տարածք է: Ըստ նրա՝ այստեղ գրեթե բոլոր ժամանակաշրջաններն արտացոլված են:

«Վայոց ձորում ուսումնասիում ենք մարդու բնակեցման վաղագույն փուլերը: Նոր հուշարձանների հայտնաբերումը շատ կարևոր է, որովհետև դրանք ցուցակներում չկան: Այդ հուշարձանները կարելի է օգտագործել զբոսաշրջությունը զարգացնելու գործում»,-ասաց Բորիս Գասպարյանը:

Միջերկրածովյան և արևելքի երկրների ուսումնասիրության միջազգային ասոցիացիայի գիտաշխատող Ռոբերտո Դանն իր արշավախմբի հետ Հայաստանում սկսել է աշխատել 2013 թվականից: Արշավախմբի ուսումնասիրման կենտրոնում այն տարածքներն են, որոնք տեղեկություն են պարունակում Ուրարտուի վերաբերյալ:

«Վերջին վեց տարվա աշխատանքը հաստատեց, որ մեծ ներուժ կա նշված տարածքներում: Վայոց ձորից կառանձնացնեի Քյոշք հնավայրը, որը, կարծում եմ, ուրարտական կենտրոնական հնավայրերից մեկն է լինելու»,-ասաց Ռոբերտո Դանը:

Մանրամասները՝ տեսանյութում: