«Ուժեղ եղեք, մենք ձեզ հետ ենք». «Ավրորայի» մրցանակակիր Թոմ Քաթինան ուղերձ է հղել հայ ժողովրդին (տեսանյութ)

23:50 • 04.10.20

Ամերիկացի բժիշկ Թոմ Քաթինան, որը մարդասիրական առաքելություն է իրականացնում Սուդանում և հանդիսանում «Ավրորա» մրցանակի դափնեկիր, իր զորակցությունն է հայտնել Արցախին և Հայաստանին:

Վերջինս տեսաուղերձ է հրապարակել Սուդանից, որում կնոջ հետ միասին կարևոր ուղերձ է հղում հայ ժողովրդին:

«Մենք լավ գիտենք, թե ինչի միջով եք դուք անցնում: Մենք ամեն օր աղոթում ենք ձեզ համար: Ձեզ հետ ենք Արցախում և Հայաստանում, ուժեղ եղեք»,- ասել է Քաթինան:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3145 զոհ, ավելի քան 5270 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։

Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։