«Արցախին մեր օգնությունն է պետք, ոչ թե ցույցերը». Արա Աբրահամյանը դիմել է հանրահավաքներ կազմակերպել ցանկացողներին
Ռուսաստանի հայերի միության նախագահ Արա Աբրահամյանը հայտարարությամբ է հանդես եկել՝ կոչ անելով ցույցեր կազմակերպելու փոխարեն օգնել հերոսական Արցախին ինչով հնարավոր է:
«Սիրելի հայրենակիցներ, վտանգավոր իրողությունները, որոնք տեղի են ունենում այն բանից հետո, երբ Ադրբեջանն ու Թուրքիան իսլամիստ ջիհադականների զանգվածային մասնակցությամբ հարձակվել են Արցախի խաղաղ բնակչության դեմ, անտարբեր չեն թողել և ոչ մի հայի:
Արցախում այսօր որոշվում է ոչ միայն ղարաբաղցիների ճակատագիրը: Դա մենք հասկանում ենք, դա հասկանում և մեզ աջակցում են Ռուսաստանի ողջամիտ ուժերը: Միասին մենք անում ենք ամեն ինչ միջազգային ահաբեկչության դեմ պայքարում հերոսական Արցախին օգնելու համար և կարծում ենք, որ մեր գլխավոր նպատակը պատերազմն ու արյունահեղությունը կանգնեցնել է:
Մոսկվայում անցկացրած ոչ մի ցույց չի լուծի այս հարցը: Ընդհակառակը, այստեղ նման ակցիաների կազմակերպիչները մեր դեմ կտրամադրեն մեր բարեկամներին և մեզ հետ համակարծիք մարդկանց:
Ուզում եք հերոս դառնալ, Արցախը սպասում է ձեզ: Ուզում եք օգնել Արցախին, եկեք ՌԴ-ում հայերի միության կենտրոն: Մեզ պետք են ուղղաթիռներ, միևնույն ժամանակ մենք պատրաստ ենք վարձատրել ձեզ՝ ձեր աշխատանքի համար, որպեսզի ցանկության դեպքում այդ գումարն ուղարկեք Արցախի օգնության հիմնադրամին:
Կա ևս մեկ «ճակատ», որտեղ այսօր առանց կանոնների պատերազմ է վարվում: Տեղեկատվական պատերազմ: Ուզում եք օգնել Արցախին՝ մնալով տանը, ապա տարածեք սոցցանցերում ճշմարտությունը այս ոչ հավասար պայքարի մասին, այս սուրբ պատերազմի մասին: Ճշմարտությունը հրապարակեք Ղարաբաղի պատմության մասին:
Պատերազմի մեկնարկի երկրորդ օրը, երբ զրուցում էի Արցախի ղեկավարության հետ և հարցրի՝ ինչի կարիք ունեն նրանք առաջին հերթին, որպես պատասխան լսեցի. «Բոլորին հասցրեք ճշմարտությունը մեր մասին»:
Հուսով եմ, որ այդպես կանեն մեր բոլոր հայրենակիցները, հատկապես ցույցերի կազմակերպիչները»,- ասվում է Արա Աբրահամյանի հայտարարության մեջ:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3145 զոհ, ավելի քան 5270 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։
Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։










