Լուկաշենկոն հայտարարել է, որ վերջին կես տարվա ընթացքում Բելառուսի կողմից ո՜չ Ադրբեջանին, ո՜չ Հայաստանին ռազմական բեռների որևէ մատակարարում չի իրականացվել

21:38 • 04.10.20

Բելառուսի նախագահ Ալեքսանդր Լուկաշենկոն վստահեցրել է, որ վերջին կես տարում իր երկիրը ռազմական բեռներ չի մատակարարել ո՛չ Ադրբեջանին, ո՛չ Հայաստանին: Ինչպես փոխանցում է ТАСС գործակալությունը, այս մասին բելառուս առաջնորդը հայտարարել է հայ պաշտոնակցի՝ Արմեն Սարգսյանի հետ զրույցում:

Երկու երկրների ղեկավարները քննարկել են սոցիալ-տնտեսական, քաղաքական իրավիճակը Բելառուսում և Հայաստանում: Արմեն Սարգսյանը բելառուս ղեկավարին մանրամասն տեղեկացրել է Լեռնային Ղարաբաղում տիրող իրավիճակի մասին:

Առանձին անդրադարձ է կատարվել որոշ աղբյուրներում տարածված տեղեկությանը Բելառուսից Ադրբեջան ռազմական բեռների տեղափոխման մասին: Նշվում է, որ Լուկաշենկոն հստակ պատասխան է տվել, որ նման փոխադրումներ չեն արվել ո՛չ Ադրբեջանին, ո՛չ Հայաստանին:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3145 զոհ, ավելի քան 5270 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։

Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 14 մարդ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն