Որոնք են լավագույն բնական միջոցները կոշտուկներից ազատվելու համար․ 6 արդյունավետ միջոց

Կոշտուկները (мозоль) բավական տարածված խնդիր են, որոնք միշտ ուղեկցվում են ցավոտ զգացողություններով, ուստի զարմանալի չէ, որ մարդիկ փորձում են հնարավորինս շուտ ազատվել դրանցից։ Այս փոքրիկ նորագոյացություններն առաջանում են վերնամաշկի կոշտացման հետևանքով՝ դառնալով բավական տհաճ զգացողությունների պատճառ, մինչդեռ դրանցից ազատվելը ոչ միշտ է հեշտ լինում։ Առավել հաճախ դրանք ի հայտ են գալիս ոտնաթաթին և սովորաբար պայմանավորված են լինում կոշիկի սխալ ընտրությամբ, սակայն կոշտուկների առաջացման պատճառ կարող են դառնալ նաև սխալ քայլվածքը, մաշկի մշտական շփումը որևէ բանի հետ կամ ճնշումը, ինչպես նաև ֆիզիկական ծանրաբեռնվածությունը։

Գոյություն ունեն կոշտուկների դեմ պայքարի համար նախատեսված հատուկ դեղամիջոցներ ու սպեղանիներ, սակայն դրանք ոչ միշտ են բավական արդյունավետ լինում, իսկ երբեմն էլ իրենց ագրեսիվ բաղադրիչների պատճառով կողմնակի խնդիրներ են առաջացնում, սակայն, բարեբախտաբար, կան նաև բուժման բնական միջոցներ, որոնք ոչ միայն արդյունավետ են, այլև չեն առաջացնում կողմնակի բարդություններ ու տհաճ զգացողություններ։

Ձեր ուշադրությանն ենք ներկայացնում ամենապարզ ու արդյունավետ ժողովրդական միջոցները, որոնք կօգնեն հեշտությամբ ազատվել ոտնաթաթի ցավոտ կոշտուկներից ու չորացած մաշկից։

• Ոտքերն ընկղմել կաթի փոշու գոլ լուծույթի մեջ (1 թեյի գդալ կաթի փոշին լուծել 1 լիտր ջրում), պահել մինչև մաշկը փափկի, այնուհետև հալվե վերայի տերևը կիսել, ներքին կողմով դնել կոշտուկին, ամրացնել ու թողնել ամբողջ գիշեր։ Այս պրոցեդուրան հարկավոր է կրկնել 2-3 օր, որից հետո փորձել զգուշորեն հեռացնել կոշտուկը։
• Հում կարտոֆիլը քերիչով մանրացնել, այնուհետև ստացված խյուսը քսել կոշտուկին, ծածկել մաքուր բինտով կամ ախտազերծված կտորով և գուլպա հագնել։ Թողնել կոմպրեսը մի քանի ժամ, այնուհետև փորձել զգուշորեն հեռացնել կոշտուկը պեմզայի քարով։
• Մատուտակի արմատը (քաղցրարմատ) մանրացնել, ավելացնել նույն քանակությամբ վազելինին ու լավ խառնել։ Ստացված քսուքը քսել կոշտուկին, ծածկել կպչուն սպեղանիով, իսկ մաշկը գոլ ջրի մեջ փափկելուց հետո զգուշորեն փորձել հեռացնել կոշտուկը։ Անհրաժեշտության դեպքում այս պրոցեդուրան հարկավոր է կրկնել այնքան մինչև հնարավոր լինի հեշտությամբ հեռացնել կոշտուկը։ Այս քսուքը կարելի է կիրառել նաև կոշտուկների առաջացման կանխարգելման համար՝ պարբերաբար քսելով այն չորացած ու կոշտացած մաշկին։
• Քնելուց առաջ ոտքերն ընկղմել տաք ջրի մեջ մինչև մաշկը փափկի, այնուհետև կիտրոնի կեղևը (մի փոքր պտղամսով) դնել կոշտուկին, ամրացնել կպչուն սպեղանիով ու թողնել ամբողջ գիշեր։ Կրկնել այս պրոցեդուրան 2-3 գիշեր, այնուհետև կրկին փափկեցնել մաշկը տաք ջրով և փորձել զգուշորեն հեռացնել կոշտուկը։
• Ոտքերի մաշկը տաք ջրով փափկեցնել, այնուհետև որևէ փշատերև ծառից ստացված խեժը դնել կոշտուկին, ամրացնել կպչուն սպեղանիով ու թողնել ամբողջ օրը։ Մեկ օր անց սպեղանին հարկավոր է փոխել։ Այս պրոցեդուրան հարկավոր է կանոնավոր կրկնել այնքան ժամանակ մինչև հնարավոր լինի հեշտությամբ հեռացնել կոշտուկը։
• 100 գրամ փշատերևներին ավելացնել մի լիտր ջուր, դնել կրակին ու 10 րոպե եփել, այնուհետև թողնել մի փոքր թրմվի ու սառչի։ Ոտքերը դնել ստացված գոլ եփուկի մեջ մինչև մաշկը փափկի, այնուհետև սոճու կամ եղևնու խեժը դնել կոշտուկին ու ամրացնել բժշկական կպչուն սպեղանիով՝ թողնելով ամբողջ գիշեր։ Առավոտյան սպեղանին դեն նետել և փորձել զգուշորեն հեռացնել փափկած կոշտուկը։

Այս բնական միջոցները ոչ միայն պարզ են ու հասանելի, այլև շատ արդյունավետ, սակայն հարկ է հիշել, որ առողջական լուրջ խնդիրների դեպքում հարկավոր է դիմել բժշկին, քանի որ ինքնաբուժությունը կարող է ոչ միայն անարդյունավետ լինել, այլև շատ վտանգավոր։ Եթե խնդիրը չափազանց լուրջ է, ապա հարկավոր է առաջին հերթին դիմել մաշկաբանին՝ կոշտուկը հատուկ պրոցեդուրայի միջոցով ու բացառապես բժշկի հսկողության տակ հեռացնելու համար, քանի որ նման դեպքերում բնական միջոցները կարող են բացարձակապես անարդյունավետ լինել։ 

Նյութի աղբյուրը՝ Aif.ru