Ինչպես մեղմել մոծակի խայթոցով պայմանավորված քորը

Տարվա շոգ եղանակներին մոծակները բավական ակտիվ են լինում, ուստի մարդիկ հաճախ են բախվում դրանց խայթոցի դեպքերին։ Մոծակի խայթոցը սովորաբար ուղեկցվում է սաստիկ քորով ու այտուցով՝ բացասաբար անդրադառնալով կյանքի որակի վրա, մինչդեռ մասնագետները խորհուրդ են տալիս խուսափել մաշկը քորելուց, քանի որ այդ դեպքում տհաճ զգացողությունները միայն ուժգնանում են։

Մանկաբույժ Իրինա Լիսենկոն gazeta.ru-ի հետ զրույցում ներկայացրել է մոծակի խայթոցով պայմանավորված քորից ազատվելու միջոցներն ու պարզ քայլեր մաշկը չքորելու համար։

Առաջին հերթին քորից ազատվելու համար մասնագետը խորհուրդ է տվել կիրառել ցինկ պարունակող քսուք կամ կալամինի լուծույթ։ 

«Եթե պապուլայի քորը չափազանց ուժեղ է, ապա կարելի է մեկտոկոսանոց հիդրոկորտիզոնով քսուք քսել», - նշել է մասնագետը՝ հավելելով, որ քսուքը հարկավոր է քսել օրական երեք անգամ մինչև քորը դադարի անհանգստացնել։

Ձեռքի տակ համապատասխան դեղորայքի բացակայության դեպքում բավական արդյունավետ կարող է լինել կերակրի սոդայով ու հասարակ ջրով պատրսատված մածուկը։

«Վիճակը կարող է մեղմել նաև 20 րոպե խայթոցի հատվածում սառը ջրով թրջոց դնելը կամ 10 վայրկյան շարունակ պապուլայի վրա ճնշում գործադրելը», - հավելել է մանկաբույժը։

Լիսենկոյի խոսքով՝ խայթոցի հատվածում մաշկը չքորելու համար հարկավոր է այն ծածկող հագուստ կրել կամ ծածկել պապուլան բժշկական կպչուն ժապավենով։ Եթե մոծակի խայթոցից տուժել է երեխան, ապա ցանկալի է փոքրիկի եղունգները հնարավորինս կարճ կտրել, որպեսզի նա չկարողանա քորել ու գրգռել մաշկը։