Չինաստանը պատրաստվում է ավելացնել ծնելիությունը տարեկան 2 միլիոնով
Չինաստանի իշխանությունները պատրաստվում են ավելացնել երկրում ծնելիությունը տարեկան երկու միլիոնով: Վերջին ժամանակներս Պեկինը վերանայում է «Մեկ ընտանիք՝ մեկ երեխա» քաղաքականությունը, որը վարում է անցած դարի 70-ական թվականներից, գրում է «Ազատություն» ռադիոկայանի ռուսական ծառայությունը:
Առողջության և ընտանիքի պլանավորման հարցերով հանձնաժողովի ներկայացուցիչը հայտարարել է, որ Չինաստանի ղեկավարությունը կոչ է անում տեղական իշխանություններին ընդլայնել կանանց և երեխաների առողջության պահպանման օբյեկտների կառուցումը և մեծացնել ծննդատների թիվը:
Անցած տարվա նոյեմբերին Չինաստանի Կոմունիստական կուսակցությունը հայտարարել էր, որ այն ընտանիքներին, որտեղ ծնողներից մեկն իր ընտանիքում միակ երեխան է, թույլ կտրվի ունենալ երկրորդ երեխան: Նախկինում երկրորդ երեխա կարող էին ունենալ այն ընտանիքները, որտեղ երկու ծնողն էլ միակ երեխաներն էին։










