Ռուսաստանը Ղրղզստանին 1,2 մլրդ դոլար կտրամադրի Մաքսային միություն մտնելու համար
Ռուսաստանի Դաշնությունը Ղրղզստանին 1,2 միլիարդ դոլար կտրամադրի Մաքսային միություն պետության մուտքը հեշտացնելու համար: Այդ մասին հայտարարել է Ղրղզստանի էկոնոմիկայի նախարար Թեմիր Սարիևը, գրում է korrespondent.net-ը՝ հղում անելով vesti.ru-ին:
«Մաքսային միություն մեր տնտեսության անցավ մուտքն ապահովելու համար կստեղծվի զարգացման հատուկ հիմնադրամ՝ 500 միլիոն դոլար գրանցված կապիտալով: Այդ միջոցները կտրամադրի ռուսական կողմը»,- ասել է Սարիևը:
Բացի այդ, Ռուսաստանը Ղրղզստանին կտրամադրի ևս 500 միլիոն դոլար՝ վարկի տեսքով՝ «Զարգացման միջազգային ասոցիացիայի պայմաններով»:
«Եվս 200 միլիոն դոլար Ռուսաստանը կտրամադրի Մաքսային միությանը Ղրղզստանի միանալու «ճանապարհային քարտեզն» իրականացնելու համար: Ընդհանուր առմամբ՝ այդ գործընթացների համար կպահանջվի 377 միլիոն դոլար»,- ընդգծել է նախարարը:
Նրա խոսքով՝ պայմանավորվածությունները ձեռք են բերվել մայիսի 29-ին Աստանայում կայացած Մաքսային միության անդամ երկրների ղեկավարների հանդիպմանը: Ավելի վաղ հաղորդվել է, որ Ղրղզստանը պայմանավորվում է Մաքսային միությանն անդամակցությունը հետաձգելու մասին:










