ԵՄ-ն կարգելափակի «Հարավային հոսքը»՝ մինչև Ուկրաինայի նկատմամբ Ռուսաստանի դիրքորոշման փոփոխությունը

11:05 • 02.06.14

«Հարավային հոսք» գազի խողովակաշարի նախագիծն առաջընթաց չի ունենա՝ մինչև Ռուսաստանը չփոխի Ուկրաինայում քաղաքական ճգնաժամի նկատմամբ իր վերաբերմունքը։ Այս մասին գերմանական Frankfurter Allgemeine Sonntagszeitung շաբաթաթերթին ասել է էներգետիկայի հարցերով եվրահանձնակատար Գյունտեր Էտինգերը, գրում է «Ведомости»-ն:

 

«Մենք կվերականգնենք բանակցությունները, երբ ռուսական կողմը կրկին սկսի պահպանել միջազգային իրավունքի նորմերը և պատրաստ կլինի կառուցողական համագործակցության՝ մեր էներգետիկ օրենսդրության հիման վրա»,- նշել է Էտինգերը:

 

Նրա խոսքով՝ «Ուկրաինայի արևելքում գրեթե քաղաքացիական պատերազմի իրավիճակում և այն դեպքում, որ Մոսկվան չի ճանաչում Կիևի կառավարությունը, մենք վստահաբար ոչ մի բանի չենք հասնի մեր բանակցություններում»:

 

Էտինգերն ավելի վաղ զգուշացրել էր Մոսկվային Եվրոպայի հարավ-արևելքում «Հարավային հոսք» կառուցելու «Գազպրոմի» պլանների վերաբերյալ Եվրամիության դիրքորոշման խստացման մասին:

 

Ավելի վաղ «Գազպրոմ» ընկերության ղեկավար Ալեքսեյ Միլերը հայտարարել էր, որ Եվրոպական հանձնաժողովը չի կարող կանգնեցնել «Հարավային հոսք» նախագծի իրականացումը, և 2015-ի դեկտեմբերին ծովային հատվածով առաջին գազը կհասցվի Բուլղարիա: