Հալեպի հայաշատ թաղամասերում հրթիռակոծությունը շարունակվում է. հայերը գիշերել են ապաստարաններում (լուսանկարներ)

10:26 • 04.06.14

Հալեպի տարբեր շրջաններում, հատկապես՝ Նոր գյուղ հայաբնակ թաղամասում, զինյալ խմբավորումների կողմից հրթիռակոծությունները շարունակվում են։

 

Երեկ երեկոյան երկու հրթիռ է պայթել Ազգային Զավարյան վարժարանի փողոցում՝ նյութական մեծ վնասներ հասցնելով շրջապատին։

 

Հալեպի Tert.am-ի աղբյուրների փոխանցմամբ՝ հայերը շարունակում են մնալ նկուղներում կամ ազգապատկան շենքերի սրահներում, որոնցից մեկում, օրինակ, գիշերն անցկացրել է 100-ից ավելի մարդ։

 

Սիրիայում երեկ նախագահական ընտրություններ են կայացել, և վերջին օրերի լարվածությունը պայմանավորված է եղել հենց այդ հանգամանքով։

 

Tert.am-ի հալեպահայ աղբյուրներն ավելի վաղ տեղեկացրել էին, որ Հալեպի հայաշատ Նոր գյուղ թաղամասը վերջին օրերի հրթիռակոծությունների հետևանքով անճանաչելի է դարձել. քարուքանդ եղած փողոցներ, վնասված ազգապատկան շենքեր, եկեղեցիներ ու դպրոցներ։

 

Սոցցանցում տարածված լուսանկարներից երևում է, որ վնասվել է Սահակյան վարժարանը, Սուրբ Գրիգոր Լուսավորիչ եկեղեցին, «Կիլիկիա» ազգային շենքը, բազմաթիվ բնակարաններ, խանութներ,արհեստանոցներ։

 


Ազգային Սահակյան վարժարան

Սահակյան վարժարանի պատը

Սուրբ Գրիգոր Լուսավորիչ եկեղեցին