Բրյուսելում մեկնարկել է G7 գագաթնաժողովը՝ 17 տարվա մեջ առաջին անգամ առանց Ռուսաստանի

12:52 • 04.06.14

Համաշխարհային գերտերությունների առաջնորդները կհանդիպեն G7 գագաթնաժողովի շրջանակում՝ 17 տարվա մեջ առաջին անգամ առանց Ռուսաստանի. ՌԴ նախագահ Վլադիմիր Պուտինին թույլ չեն տվել մասնակցել բանակցություններին՝ Ղրիմի միացման և Ուկրաինայի արևելքում իրավիճակի ապակայունացման գործում Ռուսաստանի ոչ կառուցողական դերի պատճառով, հայտնում է newsru.com-ը։

 

Երկօրյա G7 գագաթնաժողովն անցկացվում է Բրյուսելում՝ նախկինում նախատեսված Սոչիի փոխարեն։ Մասնակիցները կքննարկեն արտաքին քաղաքականությանը, տնտեսությանը, առևտրին և էներգետիկ անվտանգությանն առնչվող հարցեր։ Վերջին հարցը հատկապես զգայուն է ԵՄ երկրների համար՝ հաշվի առնելով այն, որ Մոսկվան Եվրոպա է մատակարարում նավթի և գազի գրեթե 1/3-ը։

 

Ըստ տեղեկացված աղբյուրների՝ հանդիպման գլխավոր թեմաները կլինեն Ուկրաինայի ճգնաժամը և հարաբերությունները Ռուսաստանի հետ։

 

G7-ում ընդգրկված են Մեծ Բրիտանիան, Գերմանիան, Իտալիան, Կանադան, ԱՄՆ-ն, Ֆրանսիան, Ճապոնիան։