Ռուսաստանում քրեական պատասխանատվություն կնախատեսվի երկրորդ քաղաքացիությունը թաքցնելու համար
«ՌԴ քաղաքացիության մասին» օրենքում փոփոխությունների համաձայն՝ ռուսները, որոնք ունեն այլ քաղաքացիություն, ձեռքբերման օրվանից հետո 60 օրվա ընթացքում պարտավոր են գրավոր տեսքով տեղեկացնել այդ մասին Դաշնային միգրացիոն ծառայության տարածքային մարմնին, գրում է Russia Today-ը:
Միևնույն ժամանակ, օրենքը թույլ է տալիս դա չանել Ռուսաստանի այն քաղաքացիներին, ովքեր մշտապես ապրում են երկրի սահմաններից դուրս և ունեն նաև այլ քաղաքացիություն և կացության իրավունք: Օրենքի տեքստն այսօր հրապարակվել է «Ռոսսիյսկայա գազետա»-ի կայքում:
Ըստ օրենքի ՝ անհրաժեշտ կլինի նաև տեղեկացնել Դաշնային միգրացիոն ծառայությանը երեխաների մոտ երկրորդ քաղաքացիության առկայության մասին: Այդ տվյալները թաքցնելու համար նախատեսվում է քրեական պատասխանատվություն մինչև 200 հազար ռուբլու չափով տուգանքի կամ մինչև 400 ժամ հարկադիր աշխատանքի տեսքով:
Այն դեպքում, եթե մարդը չհասցնի տեղեկացնել ծառայությանը կամ մի բան շփոթի հայտարարության մեջ, նրան կարող են ենթարկել վարչական պատասխանատվության և տուգանել 500-ից մինչև 1.000 ռուբլու չափով:
Օրենքն ուժի մեջ է մտնում դրա պաշտոնական հրապարակման օրվանից 60 օր հետո։










