Սիեթլի համալսարանում կրակոցների հետևանքով վիրավորվել է 3 մարդ. կա զոհ (լուսանկարներ)
Մեկ հոգի մահացել է, երեքը՝ վնասվածքներ ստացել Սիեթլի Խաղաղօվկիանոսյան համալսարանի ուսանողական քաղաքի տարածքում հնչած կրակոցների հետևանքով, գրում է korrespondent.net-ը՝ հղում անելով Associated Press-ին:
Կրակոցները, որոնց մանրամասները հայտնի չեն, հնչել են բնական գիտությունների ֆակուլտետի շենքում: «Մենք նստած էինք ֆիզիկայի ժամին, երբ լսեցինք բարձր ձայն: Մենք կարծեցինք, թե դա գիտական փորձ էր, բայց այնուհետև լսեցինք լացի ձայներ և աղաղակներ մեր դռան մոտ: Մենք դուրս եկանք և տեսանք գորգի վրա արյան հետքեր»,- պատմել է ողբերգության ականատեսներից մեկը:
Ոստիկաններին հաջողվել է բռնել հարձակվողին, ընդ որում՝ սկզբում հաղորդվում էր, որ հանցագործները երկուսն են եղել, սակայն այդ տեղեկությունը չի հաստատվել:
Հարբորվյուի բժշկական կենտրոն է տեղափոխվել չորս վիրավոր: Մեկը մահացել է հիվանդանոցում, ևս մեկի՝ 24-ամյա աղջկա վիճակը գնահատվում է ծանր, մյուս վիրավորների կյանքին վտանգ չի սպառնում: Թե արդյոք հոսպիտալացվածների թվում է հանցագործը, չի հաղորդվում:
Ուսանողական քաղաքի տարածքում շենքն այժմ ստուգում են SWAT հատուկ ստորաբաժանման մարտիկները: Բուհի ղեկավարությունը կոչ է արել ուսանողներին դուրս չգալ փողոցներ:










