Սպանությունների մեղադրանքով Վիեննայում ձերբակալել են Ղազախստանի նախագահի նախկին փեսային

08:48 • 06.06.14

Մարդկանց սպանությունների ու առևանգումների մեղադրանքով Ավստրիայի մայրաքաղաք Վիեննայում ձերբակալվել է Ղազախստանի նախագահ Նուրսուլթան Նազարբաևի նախկին փեսան՝ Ռախատ Ալիևը։


Ինչպես տեղեկացնում է Лента–ն, Agence France-Presse-ին հղումով, Ավստրիայի իշխանություններն Ալիևի ձերբակալման օրդերը ստորագրել են մայիսի 19-ին։


Աղբյուրը մանրամասնում է, որ նախկինում Ալիևն ամուսնացած է եղել Նազարբաևի ավագ դստեր՝ Դագիրայի հետ։ Արդյունքում նա նշանակվել է Ավստրիայում Ղազախստանի դեսպան։


Սակայն 2007թ. Ղազախստանում Ալիևի դեմ քրեական գործ է հարուցվել, որի շրջանակներում նա մեղադրվել է 2 բանկիրի առևանգման համար. 4 տարի անց հայտնաբերվել են նրանց դիակները։


Այս ամենի հետևանքով արդեն ամուսնալուծված Ալիևին հեռակա կարգով դատապարտել են 20 տարվա ազատազրկման, սակայն նրան հաջողվել է խուսափել պատժից՝ տեղափոխվելով Ավստրիա։


Лентa-ն հավելում է, որ Նազարբաևի նախկին փեսան դատապարտվել է ևս 20 տարվա ազատազրկման՝ պետական հեղաշրջման փորձ իրականացնելու համար։


2011 թ. հուլիսին Ավստրիայի իշխանությունները սեփական հետաքննություն են սկսել ղազախ դեսպանի գործով։