Հաիթիում զանգվածային բողոքի ցույցեր են սկսվել՝ նախագահի հրաժարականի պահանջով
Առնվազն 5 հազար մարդ դուրս է եկել Պորտ-Օ-Պրենսի փողոցներ՝ պահանջելով Հաիթիի Հանրապետության նախագահ Միշել Մարտելիի անհապաղ հրաժարականը, գրում է ria.ru-ն՝ հղում անելով BBC-ին:
Ցուցարարները դժգոհ են գների աճից և կոռուպցիայի բարձր մակարդակից։
Նրանք պահանջում են, որ Մարտելին վայր դնի նախագահի լիազորությունները, պահանջում են նաև արտահերթ նախագահական ընտրություններ:
Ինչպես հաղորդում է BBC-ն, ցուցարարներից մի քանիսի պաստառների վրա գրված են ԱՄՆ-ի, Կանադայի և Ֆրանսիայի առաջնորդներին ուղղված կոչեր՝ «Օգնել Հաիթիի քաղաքացիներին ազատվել իշխանության մեջ գտնվող քաղաքական գործիչներից»:
Ցուցարար քաղաքացիների և ոստիկանության միջև տեղի ունեցած բախումների ընթացքում իրավապահներն արցունքաբեր գազ են օգտագործել: Զոհերի մասին տեղեկություններ չկան:
2012թվականի սկզբից ի վեր երկրում պարբերաբար տեղի են ունենում նախագահ Մարտելիի հրաժարականի պահանջով ցույցեր, ով իշխանության է եկել 2011 թվականին։










