Հալեպում դարձյալ հայ է զոհվել

08:30 • 09.06.14

Հալեպի հայաշատ Նոր գյուղ թաղամասում հունիսի 1-ին արձակված ինքնաշեն հրթիռների պայթյունի պատճառով վիրավորված Լևոն Չերչյանը մահացել է։


Ինչպես տեղեկացնում է Հալեպի «Գանձասար» շաբաթաթերթի ֆեյսբուքյան էջը, 1963թ.-ին ծնված Լևոն Չերչյանի հուղարկավորության արարողությունը տեղի է ունենալու այսօր՝ Հալեպի Սուրբ Աստվածածին եկեղեցում։
 

Հալեպում արդեն 6-րդ օրն է ջրամատակարարումն ամբողջությամբ դադարել է։ Բնակչությունն օգտագործում է մզկիթների և ակումբներում փորված ջրհորների ջուրը, սակայն դա խմել չի թույլատրվում։

 

Ժամանակ առ ժամանակ որոշ շրջաններում ժամանակավորապես միանում է ջրամատակարարումը, սակայն բնակչությանը կոչ է արվում չխմել նաև այդ ջուրը։ Ջրհորների և ժամանակավորապես միացած ծորակի ջուրը խմողներն առողջական խնդիրներ են ունեցել և բուժում են ստացել Հալեպի հիվանդանոցներում։
 

Սիրիայում շարունակվող պատերազմի ընթացքում ըստ տարբեր տվյալների 130-160 հազար մարդ է զոհվել։ Զոհված հայերի թիվն անցնում է 100-ը։